ଶୀତ ସଞ୍ଜ
ଶୀତ ସଞ୍ଜ
ସୂରୁଜ ଦେବତା ବିଦାୟ ନେଲେଣି
ପକ୍ଷୀ ସବୁ ଗଲେ ଉଡି ।
ଗାଈଆଳ ଟୋକା ଗୋଗୋଷ୍ଠ ଆଣିଲା
ବତ୍ସା ଦେଲେ ହମ୍ବା ରଡି ।୧।
ଶୀତ ଦିନ ଏବେ ସଞ୍ଜ ନଇଁଲାଣି
ଫେରିଲେ ସବୁ ଘରକୁ ।
ଦିନଯାକ କାମ ସରିଗଲା ସବୁ
ନାହିଁ ସଞ୍ଜ ପହରକୁ ।୨।
ସଞ୍ଜ ପହରରେ ଗାଁଲୋକେ କିଛି
ରୁଣ୍ଡାଇ ପୁଣ୍ଡାଇ କାଠ ।
ଜାଳୁଛନ୍ତି ନିଆଁ ଗାଁ ଦାଣ୍ଡଟାରେ
ପିଲାଏ କରନ୍ତି ନାଟ ।୩।
ନିଆଁ ପୋଉଁଛନ୍ତି ଗୀତ ଗାଉଛନ୍ତି
ଉଷୁମ ଲାଗିଲେ ଦିହ ।
ଯିଏ ଯା ଘରକୁ ଚାଲିଯାଇ ପାଠ
ପଢିବେ ଦେଖିବ ରହ ।୪।
ଶୀତ ଦିନ ସଞ୍ଜ ଆସିଗଲା ଏବେ
ଘରେ ସବୁ ରହିଛନ୍ତି ।
ଅତି ଦରକାର ନପଡିଲେ କେହି
ଘରୁ ବାହାରୁ ନାହାନ୍ତି ।୫।
ଯା ଦେହରେ ଦେଖ ଅଛି ଶୀତ ଲୁଗା
ଲାଗୁଅଛି ଶୀତ ଶୀତ ।
ଜାଡରୁ ମୁକତି ପାଇବା ପାଇଁକି
ଶୀତବସ୍ତ୍ର ପରିହିତ ।୬।
ଶୀତୁଆ ସଞ୍ଜରେ ସଅଳ ସଅଳ
ଚଉରା ମୂଳରେ ଯାଇ ।
ସଞ୍ଜ ଦେଉଅଛି ବୋହୂ ଭୁଆସୁଣୀ
ଶୀତକୁ ଖାତିର ନାହିଁ ।୭।
ଘଣ୍ଟ ଘଣ୍ଟା ଶଙ୍ଖ ଶୁଭିଲାଣି ଦେଖ
ଦେବାଳୟମାନଙ୍କରେ ।
ସଞ୍ଜ ଆରତୀ ସମୟ ହୋଇଅଛି
ଦେଖିଆସ ଯାଇ ଥରେ ।୮।
କୃଷକ ଫେରିଲା କ୍ଷେତରୁ ତାହାର
ଧାନ କଟାକଟି ସାରି ।
ବାନ୍ଧି ଆଣି ତାକୁ ଖଳାରେ ରଖିବ
ଧାନଗଦାଟିଏ ମାରି ।୯।