ଶୀତ ରାଣୀ ଆସିଲାଣୀ

        ଆସିଛି ଶୀତ ଚାଲରେ ମିତ

           କରିବା କସରତ

        ଶରୀର ହେବ ପଥର ପରି

          ଶୁଦ୍ଧ ହୋଇବ ରକ୍ତ ।

        ବଡ଼ି ଭୋଅରୁ ଶେଯରୁ ଉଠି

          ବସିଲେ ବ୍ୟାୟାମରେ

         ଲାଗିବ ଫୁର୍ତ୍ତି ମନ ନିଶ୍ଚଳ

          ରହିବା ନିରୋଗରେ ।

        ଖାଇଲେ ଯାହା ହଜମ ହୁଏ

          ଶୀତଋତୁ ଏ କାଳେ

        ଲାଗଇ ଭଲ ଶୋଇବା ପାଇଁ

          ମୋଟା କମ୍ବଳ ତଳେ ।

         ନିଆଁ ଜଳାଇ ପିଲାଠୁଁ ବୁଢ଼ା

           ହାତ ଗୋଡ଼କୁ ସେକି

        ମନ ଯେ ଡା଼କେ ବସିବା ପାଇଁ

          ଖରା ଜାଗାଟେ ଦେଖି ।

        ଲାଗିଲେ ଜାଡ଼ ଖୋଜା ପଡ଼ଇ

           ଉଷୁମ  ବସ୍ତ୍ରମାନ

         ଥଣ୍ଡାରୁ ପୁଣି ଆରାମ ମିଳେ

          ଘୋଡ଼ାଇ ହେଲେ କାନ ।

         ଶୀତଳ ଜଳ ଗାଧୁଆ ପାଇଁ

           କରିଲେ ବ୍ୟବହାର

        ସାରା ଶରୀର ଶୀତରେ କମ୍ପେ

            ହୁଅଇ ଥରଥର ।

         ତଥାପି ନିତି ଜରୁରୀ ଆମ

            ଶରୀର ପକ୍ଷେ ସ୍ନାନ

        ନିଇତି କଲେ ଜଳରେ ସ୍ନାନ

           ଭଲରେ କଟେ ଦିନ ।

          ପନିପରିବା ତଟକା ଶାଗ

           ସବୁଜିମା ଚୌଦିଗେ

        ସୋରିଷ କ୍ଷେତ ସୁନେଲି ଆଭା

           ଖେଳେ ଦିଗ ବିଦିଗେ।

         ସବୁ ସୁବିଧା ମିଳେ ଶୀତରେ

             ବସନ୍ତ ଆବାହକ

        ଋତୁ ପାଲିଙ୍କିରେ ଶୀତର ଗୀତ

            ପ୍ରାଣେ ଭରେ ମହକ ।।