ଆମେ ଓଡିଆ

ଓଡ଼ିଆ ଆମେ, ଓଡ଼ିଆ ଆମେ,

              ଓଡିଶା ଆମ ରାଜ୍ୟ,

ଦେଉଳ, ଗୁମ୍ଫା, ଦେହରେ ଅଛି,

             ଶିଳ୍ପୀଙ୍କ କାରୁ-କାର୍ଯ୍ୟ !

ଆମ ରାଇଜେ, ପୁରୀରେ ଅଛି,

               ଜଗନ୍ନାଥଙ୍କ' ଧାମ,

କଟକେ ହୁଏ, ଚାନ୍ଦି ରୂପାରେ,

              .ତାରକସିର କାମ !

ସବୁଠୁଁ ବଡ଼,ଚିଲିକା ହ୍ରଦ,

              ପାଣି ଯାହାର ଲୁଣି,

ଭରି ରହିଛି, କୋଇଲା, ଲୁହା,

              ଧାତୁ-ପଥର ଖଣି !

ଓଡିଶୀ ନୃତ୍ୟ, ଦେଶ-ବିଦେଶେ,

               ଦିଅଇ ପରିଚୟ,

ଖୋର୍ଦ୍ଧା ପାଇକ, ବୀରଙ୍କୁ ଥିଲା,

            .ବ୍ରିଟିଶ ସେନା ଭୟ !

ପଞ୍ଚ-ସଖାଙ୍କ', ପୋଥିରୁ ଆମେ,

               ଅରଜିଥାଉ ଜ୍ଞାନ,

ତନ୍ତରେ ବୁଣା, ବସ୍ତ୍ର ରଖିଛି,

             ବୁଣାକାରଙ୍କ' ମାନ !

ତିରିଶି ରାଜ୍ୟ, ଭିତରେ ଏହା,

             ଅଗ୍ରଣୀ ଭବେ ଗଣା,

ବାରବାଟୀର ଭଗ୍ନ ଦୁର୍ଗରୁ,

             ବୀରତ୍ୱ ହୁଏ ଜଣା !

ହୀରାକୁଦର ଆନିକଟରୁ,

             ବିଜୁଳି-ଶକ୍ତି ଆସେ,

ଫସଲ ପାଇଁ, କୃଷକ କ୍ଷେତ,

            ବରଷ ସାରା ଚଷେ !

ବିଧାନସଭା, ସଚିବାଳୟ,

             ଭୁବନେଶ୍ୱରେ ଅଛି,

ବଙ୍ଗୋପ-ସିନ୍ଧୁ, ତରଙ୍ଗ-ମାଳା,

           ଆନନ୍ଦେ ଉଠେ ନାଚି !

ବାରଙ୍ଗଠାରେ, ଚିଡ଼ିଆ-ଖାନା,

              କରଇ ଆକର୍ଷଣ,

ପର୍ଯ୍ୟଟକଙ୍କ, ଦେଖିବା ପାଇଁ,

           ରହିଛି କେତେ କ'ଣ !

ଓଡ଼ିଆ ଆମେ, ଓଡ଼ିଆ ଭାଷା,

             ଓଡ଼ିଆ ଆମ ଜାତି,

ଆମ ରାଜ୍ୟର, କଳା ଚାତୁରୀ,

           ଲଭିଛି ବିଶ୍ୱେ ଖ୍ୟାତି !