ମାଆ ର ପଣତ ମୋ ପାଇଁ କି ନେତ

ମାଆର ପଣତ ମୋ ପାଇଁ କି ନେତ 

ମାଆ ହାତରନ୍ଧା ମୋ ପାଇଁ ଅମୃତ |୧|

ମାଆ ର କୋଳ ତ ମୋ ପାଇଁ ଝୁଲଣା

ମାଆ କୋଳେ ଥିଲେ ସୁଖ ଲାଗେ ସିନା |୨|

ମୋ ମାଆ ର ହାତ ମଥା ପରେ ଥିଲେ 

ସବୁ କାର୍ଯ୍ୟ ମୋର ସିଦ୍ଧି ହୁଏ ଭଲେ |୩|

ମନେ ପଡେ ଆଜି ପିଲା ଦିନ କଥା

ମାଆ ର କୋଳ ରେ ରଖୁଥିଲି ମଥା |୪|

ପଣତ କାନିରେ ମୁହଁ ପୋଛି ଦେଇ

ମୋ ମାଆ କୋଳରେ ଦିଏ ସେ ଶୁଆଇ |୫|

କହୁଥିଲି ମାଆ ଖାଇ ନାହିଁ ମୁହିଁ 

ଭୋକ ଲାଗିଲାଣି ଦିଅ ମା ଖୁଆଇ |୬|

ହସି ହସି ମାଆ ଖାଇବାକୁ ଦିଏ

ଲାଗଇ ସତେକି ଅମୃତ ପରାୟେ |୭|

କେତେ କେତେ ଅଳି ସହିଛି ମୋ ମାଆ 

ମାଆ ସମ କିଏ ଅଛି ଏ ଦୁନିଆ |୮|

ମାଆ ଆଶୀର୍ବାଦ ଅଛି ମୋ ମଥାରେ

ନାହିଁ କିଛି ଭୟ ଏ ସାରା ସଂସାରେ |୯|

ମାଆ ହାତ ଧରି ବାଟ ମୁଁ ଚାଲିଛି

ତା କାଖରେ ଥାଇ ଜହ୍ନ କୁ ଡାକିଛି |୧୦|

ମାଆ ର ଡାକରେ ଝରିପଡ଼େ ମହୁ

ସବୁଠାରୁ ଭଲ ଅଟେ ମୋର ବୋଉ |୧୧|

ଘର ଟି ମୋହର ଅଟେ ଶ୍ରୀମନ୍ଦିର

ସେ ଘରେ ଅଛନ୍ତି ଚଳନ୍ତି ଠାକୁର |୧୨|

ପିତା ମୋ ଅଟନ୍ତି ସ୍ୱୟଂ ଜଗନ୍ନାଥ

ଲକ୍ଷ୍ମୀ ସ୍ୱରୂପିଣୀ ମାଆ ବିରାଜିତ |୧୩|

ସେହି ମନ୍ଦିର ରେ ସେବକ ମୁଁ ଜଣେ 

ସେବା ମୋର ଧର୍ମ ତାଙ୍କରି ଚରଣେ |୧୪|

ମାଆ ର ତ୍ୟାଗ ର ତୁଳନା ଯେ ନାହିଁ

ମାଆ ପରି ଆଉ କେହି ହେବେ ନାହିଁ |୧୫|

ମାଆ ବୋଲି ତାକୁ ଡାକି ଦେଲେ ଥରେ

ଦଉଡି ଆସେ ସେ ଅଥୟ ଚିତ୍ତରେ |୧୬|

ପଣତ କାନିରେ ଝାଳ ପୋଛି ଦେଇ

ନିଜର କୋଳକୁ ନିଏ ଆଉ ଜାଇ |୧୭|

ସ୍ନେହ ମମତାର ମୂର୍ତ୍ତିମନ୍ତ ଦେବୀ

ତା ତ୍ୟାଗ ପ୍ରେମର କି ଉପମା ଦେବି |୧୮|

ମାଆ ର ପାଦରେ କୋଟି ଦଣ୍ଡବତ

ଆଶିଷ ବରଷା କର ଆହେ ମାତ |୧୯|