ଶେଷ ଅଭିନୟ

  ଜୀଇଁ ବାର ଅନ୍ୟ ନାମ ଜୀବନ

   କାହିଁକି କେଜାଣି ଏ ମଣିଷ କୁ

   ପ୍ରତି କ୍ଷଣେ ଅନୁକ୍ଷଣେ

   କରୁଥାଏ ତା ଜୀବନକୁ ବିପନ୍ନ ?

   ଜୀଇଁ ବାର ମୋହ 

    ପୁଣି ଜୀବିକା ର ମୋହ

   ଜୀବନ ପାଇଁ ଲୋଡା ଜୀବିକା

    ଜୀବିକା ସତେ କି ମଣିଷ ପାଇଁ

    ପାଲଟିଛି ଆଜି ମରୁ ମରୀଚିକା

    କେଉଁଠି ମାରିବ ଥକ୍କା

    ପୁଣି କେଉଁଠି ବଞ୍ଚିବା ଏକା

    କାହାକୁ ଛାଡିବ ପୁଣି କାହାକୁ ରଖିବ

     ଜୀବନ ନା ଜୀବିକାର୍ଜନ ର ମୋହ ?

     ଆଜିର ଅତ୍ୟାଧୁନିକ ମଣିଷ

     ମନ ଓ ହୃଦୟ ହୁଏ ଅଥୟ

    କେତେ ଆଉ କରିବ ମିଛ ଅଭିନୟ

     କାହାଠାରେ ନାହିଁ କାହାର ବିଶ୍ଵାସ

     ବିଶ୍ଵାସ ଅବିଶ୍ବାସ ର ଗଣ୍ଡି ଭିତରେ

     ଅଣନିଃଶ୍ବାସୀ ଆଜିର ଏ ମଣିଷ

     ପରିବାର, ପରିବେଶ, କର୍ମସଂସ୍ଥାନ

     ଯେଉଁଠି ଦେଖ ସବୁଠି

    ମିଛ ପ୍ରତିଶ୍ରୁତି 

    ମିଛ ଦୁନିଆଁରେ 

    ମଣିଷ ଜୀବନ ଦୁର୍ବିସହ ।

    ଭାଷଣ ଶୋଷଣ କଷଣ ଭିତରେ

    ମଣିଷ ବଞ୍ଚେ ଅହରହ

    ପ୍ରତିବାଦର ସ୍ବର ଦୁର୍ବଳ

    ସବୁଠି ଶୋଷକ ଗୋଷ୍ଠୀଙ୍କ 

    ରଚଇ ଆତଙ୍କ ର ଭୟ

    ଶୋଷିତ ଗୋଷ୍ଠୀ ବଞ୍ଚୁଛି 

    ଶାସକ ଶୋଷକଙ୍କ

     ଦୟାର ପାତ୍ର ସହ ।

     ବଞ୍ଚିବାର ଅଧିକାର

     ହରାଇଛି ଆଜି ଏ ମଣିଷ

     ଚତୁର୍ଦ୍ଦିଗେ ଖେଳିଛି

     ଯୁଦ୍ଧ, ହିଂସା ଓ ଦ୍ୱେଷ

     ନଷ୍ଟଭ୍ରଷ୍ଟ ଆମ ଏ ପରିବେଶ

     ଅଶାନ୍ତିର ବାତାବରଣ ମଧ୍ୟେ

    ଗତି କରେ ଆଜିର ମଣିଷ ସମାଜ

     ଅଶାନ୍ତ ପରିବେଶୁ ମୁକ୍ତି ଖୋଜୁଛି

     ଆଜିର ଏକବିଂଶ ଶତାବ୍ଦୀର ମଣିଷ ।

   ବିକାଶ ନାମେ 

   ମଣିଷ ପଣିଆ ହରାଇ

    ଭିଟାମାଟି ଛାଡ଼ି ଖଟୁଛି ଦାଦନ

    ଯେତେ ଅରଜିଲେ ମଧ୍ୟ

    ପୂରେନା ତା ପାଟି ପେଟ

    ସମ୍ପୂର୍ଣ୍ଣ ହୁଏନା ତା'ର

    ହୃଦୟ ଓ ମନ

    ସବୁଠି ଖାଲି ଚାଲେ

    ଜୀବନ ଆଉ ଜୀବିକା ପାଇଁ ଲଢେଇ

    ଶିକ୍ଷା ଓ ସଭ୍ୟତା ନାମେ

    ଏ ସଭ୍ୟ ମଣିଷ କିନ୍ତୁ 

     ଛାଡେନା ତା ବଡେଇ

     ଯେଉଁଠି ଦେଖ ଖାଲି

     ସବୁଠି ଭୟ ଆଉ ଭୟ

     ମଣିଷ ବଞ୍ଚିବା ମରିବାର

     ଦୋଛକିରେ ପଡି

     ଜୀବନ ଜୀବିକା ବିପନ୍ନ କରି

     ପ୍ରତି ମୁହୂର୍ତ୍ତରେ କରୁଛି

     ଏ ଅଶାନ୍ତ ପରିବେଶେ ରହି

     ତା ଜୀବନର ଶେଷ ଅଭିନୟ

     ଶେଷ ଅଭିନୟ ।

    ଜୀବନ ଜୀବିକା 

    ଆମ ପରିବାର ପରିବେଶ

    ସବୁ ହୋଇଛି ଦୁର୍ବିସହ

    ବଞ୍ଚିବା ମରିବା ସହ ସନ୍ଧି କରି

    ପ୍ରତ୍ୟେକ ଆମେ ପ୍ରତି ମୁହୂର୍ତ୍ତେ

    କରୁଛେ ଆମେ ଜୀବନର

    ଶେଷ ଅଭିନୟ

    ଶେଷ ଅଭିନୟ ।