ଶବ୍ଦର ଆଖି ଅଛି

ଶବ୍ଦର ଆଖି ଅଛି,

ଆଖି ମଧ୍ୟ ଶୁଣି ପାରେ ।

ଶବ୍ଦ ଚିହ୍ନିପାରେ,

ବାଛିପାରେ ଯୋଗ୍ୟ କାନକୁ ।

ଆଖି ଶୁଣିପାରେ,

ଅନ୍ୟ ଆଖିର ଅଶୁଣା ବ୍ୟର୍ଥତାକୁ ।

ନିଶବ୍ଦର ଦୃଷ୍ଟି ପୁଣି ଅଧିକ ତୀକ୍ଷ୍ଣ ,

ଶୁଣିପାରେ ଅପ୍ରକାଶ୍ଯକୁ ।

ଅଦୃଶ୍ଯର କାନ ଦେଖିପାରେ,

ଅବ୍ୟକ୍ତର ଦୃଶ୍ୟ ।

ବୁଝିନଥିବା କଥାବି କହିହୁଏ,

ଅକୁହା କଥାର ହିମାଳୟ ଦେଖାଯାଏ

କେବେ କେବେ ପରିଷ୍କାର ।

ଅକୁହା, ଅବୁଝା,ଅଦୃଶ୍ୟ

ସଭିଏଁ ଗୋଟିଏ ଲାଉର ମଂଜି।

ସେ ଲାଉର ନାଡୀ ଲାଗିଛି

ଶୂନ୍ୟର ନାଭିରେ

ଶୂନ୍ୟର ନାଭିରୁ,

କଁଅଳା ଲାଉ ଜନ୍ମୁଛି ।

ଯଦି କିଏ ପଚାରେ,

ଯାହା ଲେଖିଛୁ ତୁ ନିଜେ ବୁଝିପାରୁ ?

ନାଁ, ଶବ୍ଦ ଯାହା ଦେଖିଲା

ସେଇଆ ଲେଖିଛି ,

ଶବ୍ଦର ଆଖି ଅଛି।