Library
Profile
ଶବ୍ଦବୋମାର ଅନ୍ତରାଳେ
ଶବ୍ଦବୋମାର ଅନ୍ତରାଳେ
ଶବ୍ଦ ବ୍ୟବହାର ହିଁ ବିଚାର ସଂସ୍କାର
ଆଉ ବେଳେବେଳେ ବ୍ୟଭିଚାର
ଶବ୍ଦ ଉଚ୍ଚାରଣ ହିଁ ଆଚରଣ ଉଦ୍ଧାରଣ
ଆଉ ବେଳେବେଳେ ପାଗଳପଣ
ଶବ୍ଦ ବ୍ୟୁତ୍ପତ୍ତି ହିଁ ଓଁକାର ଉତ୍ପତ୍ତି
ଆଉ ବେଳେବେଳେ କଠୋରୋକ୍ତି
ଶବ୍ଦ ବିଶ୍ଳେଷଣ ହିଁ ତାର୍କିକ କାରଣ
ଆଉ ବେଳେବେଳେ ବିଷ୍ଫୋରଣ
ଶବ୍ଦର ଉପଚାର ହିଁ ସମସ୍ୟା ଆମନ୍ତ୍ରଣ
ଆଉ ସବୁବେଳେ ସମାଧାନ ନିୟନ୍ତ୍ରଣ
ବ୍ୟକ୍ତିର ବାହାର ଭିତର ଦିଶିଯାଏ କଣକଣ
ବୋଉ କହୁଥାଏ ନିତି ଅଭ୍ୟାସ କର ଛୁଆଗଣ
ଅଧୁନା କେତେ ବିଡ଼ମ୍ବନା
କିଛି ଲୋକେ ଶବ୍ଦକୁ ଧରି ପକାନ୍ତି
ଶବ୍ଦର ଅର୍ଥକୁ କଦର୍ଥ କରନ୍ତି
ବାକ୍ୟମାନଙ୍କୁ ବାକ୍ୟବାଣ ମାନନ୍ତି
ତୁଣ୍ଡରୁ ବାହାରିଥିବା ଅଭିବ୍ୟକ୍ତିକୁ
ତୁଣ୍ଡ କମାଣର ଦ୍ୱାହି ଦେଇ ମୁଁହ ଫୁଲାନ୍ତି
ଆଜି କେତେ ଇତି ବକ୍ରୋକ୍ତି
ପଛରେ କୁଆଡେ କୁତ୍ସା ରଟନ୍ତି
ବାଟୁଳି ବାଜୁନି କଥାରେ
କମା ବିରାମ ଚିହ୍ନ ବାଟ ହୁଡିଲେଣି ସଭାରେ
ଶବ୍ଦରେ ଲଗାମ ନାହିଁ
ପୂର୍ଣ୍ଣଛେଦ କାହିଁ ଦିଶୁ
ନି ଫୁଟାଣି ଗଦାରେ
ଶବ୍ଦରେ ଲାଳିତ୍ୟ ନାହିଁ
ମୁଁହ ଫଣଫଣ ଦିଶୁଥାଏ ପଦରେ ବାକ୍ୟରେ
ଏଠି ଶବ୍ଦର ମଡ଼କ ଦୁର୍ଭିକ୍ଷ
ଖାଲି ଫିଙ୍ଗାହୁଏ ଛାତିଫଟା ଶବ୍ଦବୋମା
କୁହୁଳେଇ ଦିଏ ଶତ ହିରୋସିମା
ଉସୁକେଇ ଦିଏ ଶହସ୍ର ନାଗାସାକି
ଲଢ଼େଇ କରିବାକୁ ସଜବାଜ ପରାର୍ଧ କୁରୁକ୍ଷେତ୍ର
ସବୁ ଖାଲି ପ୍ରହସନ
କଥିତ ଶବ୍ଦରୁ ମାପିବେ
ଆତ୍ମସ୍ଥ ପ୍ରଜ୍ଞାପ୍ରବୀଣ ଜନ୍ତୁରାଣ
ଅନ୍ତଃର୍ନିହିତ ମାନବୀୟ ଗୁଣ
ବାରବୁଲାର ବାରବାଟି ଚାଷ ପରି ଧୂଆଁବାଣ
ହେ ବୋକା ମାଧିଆଗଣ
ମନକର୍ଣ୍ଣ ଧ୍ୟାନ ଦେଇ ଶୁଣ
କୂଳରେ ଚକାପରି ବସି
ସମୁଦ୍ର ଦର୍ଶନ କରିପାର
ମହାସାଗର ବିଷୟରେ ବହେ
ଭାଷଣ ଦେଇପାର
ମହୋଦଧିର ନୀଳ ଉର୍ମିମାଳାକୁ ନେଇ
ସୁନ୍ଦର ଶବ୍ଦ ସୁମନ ରଚିପାର ଗୁନ୍ଥିପାର
ଅର୍ହନିଶ ମହୋଦଧିରେ ବୁଡ଼ ପକେଇ ପାର
ଭାବି କହିଲ ଦେଖି
ସମୁଦ୍ର ମାପିବା ସମ୍ଭବ ହେବ କି ?
ସମୁଦ୍ରର ଗଭୀରତା ଜାଣିବା ଅସମ୍ଭବ ନୁହଁ କି ?
