ସେବ୍ୟ ସଂସର୍ଗେ ସେବକ ପୂଜ୍ୟ

ମଣିଷ ଜନମ ଦୁର୍ଲଭ ଜନମ

ଦୟା, କ୍ଷମା ତା ଭୂଷଣ

ପ୍ରେମ ଅଟେ ତାର କାଉଁରୀ ପରଶ

ଦୋହଲାଇ ଦିଏ ମନ |

ମାନବ ଜନମ ସେବାରେ ସାର୍ଥକ

ସେବକ ସଦା ବନ୍ଦିତ

ସେବ୍ୟ ସଂସର୍ଗରେ ସମ୍ମାନ ମିଳଇ

ଏ ବିଶ୍ଵେ ପ୍ରତିଫଳିତ ।

ଗାନ୍ଧୀ, ଗୋପବନ୍ଧୁ, ମଦରଟେରେସା

ସେବା ପାଇଁ ଯେ ଅମର

ପ୍ଲରେନ୍ସ ବୋଲାନ୍ତି ଦୀପ କୁମାରୀ ଯେ

ଟେରେସା ମାଆ ବିଶ୍ଵର ।

ସେବା ସଂସର୍ଗରେ ସେବକ ହୁଅଇ

ସମ୍ମାନର ଅଧିକାରୀ

ଶ୍ରେଷ୍ଠ ପ୍ରାଣୀ କରି ମଣିଷକୁ ପରା 

ପଠାଇଛନ୍ତି ମୁରାରୀ ।

ଦୁଃସ୍ଥ, ଦୁଃଖୀ, ରଙ୍କି, ଅସହାୟ ଙ୍କର

ସେବା ଅଟେ ମହା ଧର୍ମ

ମାନବ ସେବାରେ ମାଧବଙ୍କ ସେବା

ବିଶ୍ଵ ଗୁରୁଙ୍କ ବଚ଼ନ |

ଆମରି ସଂସ୍କୃତି ଆମ ଧର୍ମଧାରା

ଏ କଥା ମଧ୍ୟ କହିଛି

ଶିବ ମନ୍ଦିରରେ ବୃଷଭ ସେବିତ

ସେବକ ହୋଇ ବସିଛି |

ସେବ୍ୟ ସଂସର୍ଗରେ ଗରୁଡ଼ ପୂଜିତ

ସେବାକାରୀ ସମ୍ମାନୀୟ

ଇଶ୍ୱର ସଂସର୍ଗ ସେବା ବିଧିପାଇଁ

ମନ୍ଦିରେ ସେବକ ପୂଜ୍ୟ ।

ମନ୍ଦିର, ମସଜିଦ୍ ଅବା ଗୁରୁଦ୍ଵାର

କିବା ଗୀର୍ଜା ପ୍ରକୋଷ୍ଠରେ

ସେବ୍ୟ ସଂସର୍ଗରେ ସବୁଠି ସେବକ

ସମ୍ମାନ ର ପାତ୍ର ହୁଏ ।

ମଣିଷ ଜୀବନ ପ୍ରଭୁଦତ୍ତ ଧନ

ଅଟଇ ବୁଦ୍ଧି, ବିବେକ

ପ୍ରେମ, ଦୟା, କ୍ଷମା,ମୈତ୍ରୀ ତ ଅଟଇ ଆତ୍ମାର ମୂଳ ଆଧାର ।

ଚେତନାରେ ଆମ ପ୍ରଭୁଙ୍କ ଇଂଗୀତ

ସର୍ବଦା ଯେ ଆସୁଥାଏ

ମନରେ ବିବେକ ଲଗାମ ଯୋଡିଲେ

ଆତ୍ମଶୁଦ୍ଧି ହୋଇ ଥାଏ |

ସେବ୍ୟ ବି ହୁଅନ୍ତି ପ୍ରଭୁ ଜଗଦୀଶ

ବିପଦେ ବ୍ୟଥିତ ନର

ହେଲେ ସେବକ ତ ନିରହଙ୍କାରୀ ଯେ

ସେବା ତା ଶାନ୍ତି ର ଘର ।

ସମ୍ମାନ ପାଇଁ ତ ସେବା କରେ ନାହିଁ

ନିଜ ଗୁଣେ ବିଭୁଷିତ

ସମ୍ମାନୀୟ ତାକୁ କରେ ତାର କର୍ମ

ସେବ୍ୟ ସଂସର୍ଗ ଆଧାର ।