ଲେଖା ମୋ ଗାଁ ଠିକଣା

ନାରିକେଳ ଗଛ ସବୁଜ ପତର
ଶିରି ଶିରି ବାଆ ଛୁଆଁ
ନୀଳ ଆକାଶର ବଉଦର ସଙ୍ଗେ
ନିତି ଭାବ ଦିଆ ନିଆ
ସେଇ ବାହୁଙ୍ଗାର ଶ୍ରୀଫଳ ପାଣିରେ
ଲେଖା ମୋ ଗାଁ ଠିକଣା ।

ମୋ ଗାଁ ରାସ୍ତାର ଦୁଇଧାରେ ଶୋଭା
ଆବାସ ସ୍ଥଳ ସୁଷମା
ନିଆରା ସୌନ୍ଦର୍ଯ୍ୟ ବିଭୂତି ମଣ୍ଡିତ
ସଜ୍ଜୀକରଣ ମହିମା
ଦୂରଦୃଷ୍ଟି ଯୁକ୍ତ ଉଚ୍ଚା ବାରଣ୍ଡାରେ
ଲେଖା ମୋ ଗାଁ ଠିକଣା  ।

ମୋ ଗାଁ ମୁଣ୍ଡର ରତ୍ନଚିରା ଧାର
ଗାଁ ପୋଖରୀ ଚାଳିଶା
ଅତୀତ ପୃଷ୍ଠାର ସ୍ମୃତି ପରୁଆକୁ
ଖୋଲି ଦେଖାଉଛି ଦିଶା
ବର ଓହଳର ମାଟି ଛୁଆଁ ସୂତ୍ରେ
ଲେଖା ମୋ ଗାଁ ଠିକଣା ।

ମାଳ,ବିଲ,ବଣ, ଆମ୍ବ ଗଛ ତଳ
ବଉଳର ମୃଦୁ ବାସ୍ନା
ମାଦଳା ପାଞ୍ଜିର ପୃଷ୍ଠା ଗାଉଅଛି
ମୋ ଗାଁ ଯେ ପ୍ରୀତିମଗ୍ନା
ବାହୁଙ୍ଗା ଫାଙ୍କର ଜହ୍ନ ଆଲୁଅରେ
ଲେଖା ମୋ ଗାଁ ଠିକଣା ।

ମୋ ଗାଁ ଆଦ୍ୟର ଦୋଳ ବେଦୀ କୁହେ
ଗାଁ ପରଂପରା କଥା
ଆଦ୍ୟ, ପ୍ରାନ୍ତ, ମଧ୍ୟ ମନ୍ଦିର ଦିଅଇ
ସଂସ୍କୃତିର ମହାବାର୍ତ୍ତା
ପର୍ବପର୍ବାଣୀର ଅନ୍ତର ପତରେ
ଲେଖା ମୋ ଗାଁ ଠିକଣା ।

ସବୁଜ ଶୋଭାର ଦୂର ଦିଗ୍ ବଳୟେ
ମୋ ଗାଆଁ ପ୍ରଦୋଷ ଶୋଭା
ପ୍ରଭାତୀ ଶଙ୍ଖର ନିନାଦ ବାଢ଼ଇ
ଆଧ୍ୟାତ୍ମ ର ଚାରୁ ବିଭା
ଆଳତୀର ଦିବ୍ୟ ଦେବ ନୀତି ଧାରେ
ଲେଖା ମୋ ଗାଁ ଠିକଣା ।

ଗାଁ ମନ୍ଦିରର ଭଜନ ଜଣାଣ
ପବିତ୍ର ମନ ଚେତନା
ଦେବା ଦେବୀଙ୍କର ଅବସ୍ଥାନେ ଗାଁ
ହୁଅଇ ବିପଦ ଶୂନ୍ୟା
ପର୍ବ ପର୍ବାଣୀର ତିଥିରେ ବିଧିରେ
ଲେଖା ମୋ ଗାଁ ଠିକଣା ।

ଆଦ୍ୟ ଶାସନର ଗୌରବରେ ମଖା
ମୋହରି ଗାଆଁ  ମହିମା
ଗାଆଁ ଅନୁଷ୍ଠାନ ଚିତ୍ତ ଚିନ୍ତନରେ
ଗାଆଁ ଉନ୍ନତି କାମନା
ଶିକ୍ଷାନୁଷ୍ଠାନର ପବିତ୍ର ବୁକୁରେ
ଲେଖା ମୋ ଗାଁ ଠିକଣା ।

ଆକାଶ ଛୁଆଁ ସେ ନାରିକେଳ ବୃକ୍ଷ
ମେଘ ସଂଗେ ପ୍ରୀତିକଥା
ବାତ୍ୟା ବିପଦର ପ୍ରତିରୋଧ ଯୋଦ୍ଧା
ଟେକିଛି ଗାଆଁ ରେ ମଥା
ନାରିକେଳ ଗଛ ପ୍ରତିଦାନ ପତ୍ରେ
ଲେଖା ମୋ ଗାଁ ଠିକଣା ।

ସବୁଜ ସମ୍ଭାର ସ୍ଵତନ୍ତ୍ରତା ସୁର
ସ୍ଵଚ୍ଛ ଦିଗନ୍ତର ଧାରା
ଶିକ୍ଷାର ପସରା ଜୀବନ ଇସାରା
ଉଦାହରଣରେ ଭରା
ଘର ସଂଲଗ୍ନତା ସ୍ୱତନ୍ତ୍ର ପିଣ୍ଡାରେ
ଲେଖା ମୋ ଗାଁ ଠିକଣା ।

ସରୋଜିନୀ ମିଶ୍ର
ସତ୍ୟବାଦୀ । ପୁରୀ