ଭାଷା ଶିଖିଥିଲେ ହେଲା

ସବୁ ତ ରହିଛି ଆମରି ଦେଶରେ ଦେଖି ପାରିଲେ ତ ହେଲା,

ଆମପ୍ରତି କିଏ ଅନ୍ୟାୟ କରୁଛି ପ୍ରତିବାଦ କଲେ ହେଲା |

ବିଦ୍ୟାଳୟ ଅଛି ବହି ବି ମିଳୁଛି ପଢି ପାରିଲେ ତ ହେଲା,

ବଜାରରେ ସବୁ ଜିନିଷ ମିଳୁଛି ପଇସା ଥିଲେ ତ ହେଲା |

ଚାରିଆଡ଼େ କାମ ଚାକିରୀ ରହିଛ ଖୋଜି ପାରିଲେ ହେଲା,

ଯେତେ ଖାଲ-ଖମା ଉଚ୍ଚ-ଢିପ ଥାଉ ଚାଲି ପାରିଲେ ହେଲା |

ଦାନ-ଧର୍ମପାଇଁ ଲୋକ କହୁଛନ୍ତି ନିଜେ କରୁଥିଲେ ହେଲା,

ମନ୍ଦିର ରହିଛି ମଠ ବି ରହିଛି ଭକ୍ତିଭାବ ଥିଲେ ହେଲା |

ନଦୀରୁ ନାଳରୁ ଜଳ ବହିଯାଏ ବାନ୍ଧି ରଖିଦେଲେ ହେଲା,

ଜଳ ଭଣ୍ଡାର ବି ଅନେକ ରହିଛି ମାଛଚାଷ କଲେ ହେଲା |

କେତେଜମି ଖାଲି ପଡ଼ିଆ ପଡ଼ିଛି ଗଛ ଲଗେଇଲେ ହେଲା,

ସବୁଠାରେ ଟଙ୍କା-ପଇସା ଉଡୁଛି ଧରି ପାରିଲେ ତ ହେଲା |

ଆଦର ସମ୍ମାନ ପ୍ରଶଂସା ମିଳିବ ଯୋଗ୍ୟ ହୋଇଥିଲେ ହେଲା,

କଥା କହିବାକୁ ଜିଭ-ପାଟିଅଛି ଭାଷା ଶିଖିଥିଲେ ହେଲା |