🙏ସର୍ବତ୍ର ରାଜିତ ଈଶ୍ୱର 🙏

ଅନନ୍ତ ମୂରତୀ ଅନନ୍ତ ଶକତି ଅନନ୍ତ ମହିମା ଧରି

ଅଛନ୍ତି ପୁରି ଅଖିଳ ବ୍ରହ୍ମାଣ୍ଡରେ ବ୍ରହ୍ମନାମ ଧରିକରି

ସେ ଶକ୍ତି, ଅତି ଅନତି ଦୂରର ଜ୍ୟୋତି,

ଅତି ଅଧଃରୁ ଉର୍ଦ୍ଧ୍ୱେ ଅଛନ୍ତି, ଅଙ୍ଗେଅଙ୍ଗେ ସେ ସଂଲଗ୍ନ ମୂର୍ତ୍ତି l

ଆକାର ଧରନ୍ତି ନିରାକାର ଶକ୍ତି ଦୁଷ୍ଟ ଦଳନ ନିମିତ୍ତ

ଆରମ୍ଭରୁ ଶେଷ ସର୍ବତ୍ର ପ୍ରକାଶ ଜଡ଼ ଚେତନ ଜଗତ l

ସେ ଈଶ, ଆନନ୍ଦମୟ ସତ୍ ପୁରୁଷ

ଆଖି ଆଗେରହି ନୁହେଁ ଦୃଶ୍ୟ, ଆଶ୍ଚର୍ଯ୍ୟରେ ହୋନ୍ତି ପରକାଶ l

ଈଶ୍ୱରୀ ଈଶ୍ୱର ପ୍ରକୃତି ପୁରୁଷ କରନ୍ତି ସୃଷ୍ଟି ଚାଳନା

ଇଚ୍ଛାରେ ପ୍ରକାଶ ଇଚ୍ଛାରେ ବିନାଶ ଜଗତ ଜଡ଼ ଚେତନା l

ଏ ବିଶ୍ୱ, ଈଶ୍ୱର ରୂପ ପରିପ୍ରକାଶ

ଇନ୍ଦ୍ରଜାଲରେ ବାନ୍ଧିଛି ପାଶ, ଇନ୍ଦ୍ରିୟ ମାୟାରେ କରି ବଶ l

ଉପାୟ କରିଣ କରିଲେ ଭଜନ ଜାଣିବ ସେ ବ୍ରହ୍ମଜ୍ଞାନ

ଉର୍ଦ୍ଧ ଅଧଃ ମଧ୍ୟ ସକଳ ବ୍ରହ୍ମାଣ୍ଡେ ଈଶ୍ୱରହିଁ ବିଦ୍ୟମାନ l

ସେ ରୂପ, ଉପମାନରେ ଏକ ସ୍ୱରୂପ

ଉପଲକ୍ଷରେ କରତୁ ଜପ, ଉଣା ଅଧିକ ନୋହି ସନ୍ତାପ l

ରୂପରେ ଗୁଣରେ କରିବ କଳନା ସଂସାରରେ ନାହିଁ କେହି

ରୂପରେ ଅରୂପବନ୍ତ ବ୍ରହ୍ମ ସିନା କ୍ରୀଡ଼ା କରୁଅଛିରହି

ସେ ଶକ୍ତି, ରୂପାନ୍ତରରେ ନାନା ବିଭୁତି

ଋକ୍ଷ କର୍କଶ କୋମଳ ଅତି, ରୁଦ୍ଧହୋଇ ସେ ମୁକ୍ତ ଅଛନ୍ତି l

ଏକ ପରକାର ବ୍ରହ୍ମ ନିରାକାର ବ୍ରହ୍ମାଣ୍ଡେ ଅଛନ୍ତି ପୁରି

ଏକାକ୍ଷର ମନ୍ତ୍ରସାଧନା କରିଲେ ପାରିବୁରେ ମନ ଧରି

ସେ ବିଭୁ, ଏକ ଅନେକ ରୂପରେ ପ୍ରଭୁ

ଏକା ସେହି ବ୍ରହ୍ମା, ବିଷ୍ଣୁ, ଶମ୍ଭୁ, ପ୍ରେମାନନ୍ଦରେ କୃପା ଢାଳିବୁ l