ଭକ୍ତି ଓ ଭକ୍ତ

ଭକତ ବତ୍ସଳ ହରି ଭକତ ଭାବେ ବିହରି

ଯୁଗେଯୁଗେ ଭକ୍ତ ଭକ୍ତି ଭାବରେ ବନ୍ଧା

ଭାବରେ କଲ ରମଣ ଗୋପପୁର ବାଳାଗଣ

ବୃନ୍ଦାବନ ଚନ୍ଦ୍ର କୃଷ୍ଣ ତ୍ରିଭଙ୍ଗୀ ଛନ୍ଦା

ଭକ୍ତିବଳେ ଭକ୍ତ ବିଦୁର

ଭୁଞ୍ଜାଇଲା ରମ୍ଭାଫଳ ବକ୍କଳ ଘର l

ଭାବରେ ଜପିଲା ଧ୍ରୁବ ସର୍ବୋଚ୍ଚ ଲଭିଲା ଠାବ

ଭକ୍ତିରେ ପ୍ରହ୍ଲାଦ ଇନ୍ଦ୍ରପଦ ପ୍ରାପତ

ଭକତିରେ ହନୁମାନ ନିଜେ ହେଲେ ଭଗବାନ

ଯୁଗେଯୁଗେ ବିଭୀଷଣ ଅମର ଖ୍ୟାତ

ଭାବରେ ଖୁଦଭଜା ଦେଇ

ଭାବଗ୍ରାହୀ କୋଟିନିଧି ସୁଦାମା ପାଇ l

ଭାବେ ଦାସିଆ ନଡ଼ିଆ ଲାଗିଲା ପ୍ରଭୁ ବଢିଆ

ବଢ଼ାଇ କର ତାହାର ହସ୍ତରୁ ନେଲ

ଭକ୍ତିରେ କରମା ବାଇ ଖେଚୁଡ଼ି ଥିଲା ଖୁଆଇ

ଗଣପତି ଭଟ୍ଟ ପାଇଁ ଗଣେଶ ହେଲ

ଭାବେ ସାଲବେଗ ପଠାଣ

ନାଚାଲିଲା ରଥ ଯେଣୁ କଲା ବନ୍ଧନ l

ଭକତ ଜୀବନ ଧନ ବୋଇଲେ ତୋ ଗୁଣ ଗାନ

ହୋଇବ ଖଣ୍ଡେ ପୁରାଣ ଧ୍ରୁବ ବଚନ

ଭକ୍ତିରେ ଡାକିଛି ଯିଏ ଉଦ୍ଧାର ହୋଇଛି ସିଏ

ଯୁଗେଯୁଗେ ଭକ୍ତି ଶ୍ରେଷ୍ଠ ଏହା ପ୍ରମାଣ

ଭକ୍ତିରେ ଭକତ ବତ୍ସଳ

ଭାଳେ ପ୍ରେମାନନ୍ଦ ବନ୍ଧା କାଳକୁ କାଳ ।