ହରାଇଲେ କେତେ ଜିତିଲେ

ହରାଇଲେ କେତେ ଜିତିଲେ କେତେ 

ଲାଭ କି ହୁଏ ସତେ

କେତେ ବା ଯାଏ କିସ ହଜାଏ

ଆସଇ ତହିଁ କେତେ ?

ହାରିବା ଲୋକ ଦୁଃଖୀ ହୁଅଇ 

ଜିଣିବା ଲୋକ ଖୁସି

ହାରିବା ପରେ ମନ୍ଦ ବୁଦ୍ଧିରେ

ଲୋକଟି ଯାଏ ରୁଷି ।

ଭିଆଏ ସେଇ ବହୁତ ହାନୀ

ହୁଏ ସବୁରି କ୍ଷତି 

ଏଇ ପରିକା ଘଟଣା ନିତି

କରୁଛି ଅଗ୍ରଗତି ।

ନିତି ଦିନିଆ ଜୀବନେ ଆମ

ଯାଉଛି ବଢ଼ି ବଢ଼ି

ଖେଳିଖେଳିକା ଲଢିଲଢିକା

ଲୋକେ ବଢାନ୍ତି କଳି ।

ବେପାର ଆଉ ବଣିଜର ଯେ

ହୁଅଇ ଲାଭ କ୍ଷତି

ଏଇ ପ୍ରକ୍ରିୟା ଘେନି ଚଳୁଛି

ନିତି ଜୀବନ ଗତି ।

ହାରିଲେ କେତେ ଜିତିଲେ କେତେ

କଳନା କରେ କିଏ 

ସବୁରି ମୂଳେ  ଅଛି ହିସାବ

ସେହି ହିଁ ଫଳ ଦିଏ ।

ଦିଅଇ ସେହି ଅନୁସାରେ ହିଁ

ହୁଅଇ ଗବେଷଣା 

ବାଛ ବିଚାର ଭେଦଭାବର

କି ଅବା ଲୋଭ ଘୃଣା ।

କରିଲେ କେତେ ମିଳଇ ଲାଭ

ହୁଅଇ କେତେ କ୍ଷତି

ସବୁକୁ ସମ ମଣଇ ଯିଏ

କରଇ ଅଗ୍ରଗତି ।

ହିସାବୀ ଲୋକ ଲୋଡ଼ଇ ସୁଖ 

ପାଏ ସେ ଖାଲି ଦୁଃଖ

ହିସାବ ହୀନ ସବୁ ସମାନ 

ଦେଖେ ସେ ଲଭେ ସୁଖ ।

ଶାନ୍ତି ସନ୍ତୋଷ ଶୃଙ୍ଖଳା ତୋଷ

ସାହସ ବାନ୍ଧିରହି

ହାନୀ ବା ଲାଭ କାହିଁରେ ଲୋଭ

ତାହାର ଲାଗେ ନାହିଁ ।