ଦୁଃଖରେ ସୁଖ

ଦୁଃଖ ସୁଖ ଦୁହେଁ ଗୋଟିଏ ମୁଦ୍ରାର 

ଦୁଇଟି ପାରୁଶ ସମ,

ତହୁଁ ଏକ ପାର୍ଶ୍ଵ ଅନୁପସ୍ଥିତିକୁ

ନ ଲୋଡ଼ିବା ମନ ଭ୍ରମ I [୧]

ଦୁଃଖ ସୁଖ ସଦା ଜୀବନର ସାଥି

ଯେହ୍ନେ ଖରା ଆଉ ଛାଇ,

ଅନ୍ଧକାର ବିନା ଆଲୋକର ସ୍ଥିତି

ଅନୁଭବୀ ହୁଏ ନାହିଁ I [୨]

ଜୀବନ ଜଞ୍ଜାଳ ପରସ୍ପର ସାଥୀ

ନିହାତି ପରିପୂରକ,

ଜଞ୍ଜାଳକୁ ଡରି ଜୀବନ ହରାଏ

ଦୁର୍ବଳ ଓ ପଳାତକ। [୩]

ଅନଳ କୁଣ୍ଡର ଉତ୍ତପ୍ତ ଶିଖାରେ

ସୁବର୍ଣ୍ଣ ନିଖିରୀ ଯାଏ,

ଝଡଝଞ୍ଜା ବ୍ୟକ୍ତି ଜୀବନରେ ଆସି

ଚରିତ୍ର ସଜାଡି ଦିଏ I [୪]

କଳା ବଉଦର କୋଳେ ଥାଇ ସିନା

ଚମକେ ବିଜୁଳି ରୂପ,

କଦାକାର ଘୃଣ୍ୟ ପଙ୍କରୁ ଜନମ

ସୁଶ୍ରୀ ପଙ୍କଜ ସ୍ୱରୂପ I [୫]

ଜୀବନରେ ଯାହା ଅବଶ୍ୟମ୍ଭାବୀ

ତାକୁ ଏଡି ହୁଏ ନାହିଁ ,

ତେଣୁ ଦୁଃଖ କ୍ଷଣେ ଅଧୀର ନହୋଇ

ବର୍ତ୍ତମାନେ ଯିବା ଜୀଇଁ I [୬]

ସୁନ୍ଦର ମନର ସୁନ୍ଦର ବିଚାର

ସୁନ୍ଦର କରାଏ କର୍ମ,

ସୁନ୍ଦର କର୍ମରେ ଜୀବନ ସୁନ୍ଦର

ସୁନ୍ଦର ଏ ଧରାଧାମ। [୭]