ସାମ୍ରାଜ୍ଯ

ରହିଛି ଏବେ ମୁଁ ମୋଠାରୁ ଦୂରରେ

ତୁଙ୍ଗଭଦ୍ରା ତୀରେ ଭାବୁଛି ବସି

ଗଢି କି ହୋଇବ ଭଗ୍ନ କୋଣାରକ

ସତେ ଶୋଇଥିବା ପ୍ରାଣ ଉଠିବ ହସି ?

ଯାଇଥିଲି ବୁଲି କମଳପୁର ମୁଁ

ବିଜୟନଗର ରାଜନବର

ଦେଖିଲି ବିଶାଳ ଅଛି ସରୋବର

ଫୁଟେନି ସରାଗେ ଆଉ କମଳ ।

ଭାଙ୍ଗିଛି ପୁରାଣ ପ୍ରସିଦ୍ଧ ନଗର

ତୁଟି ଜରାଜୀର୍ଣ୍ଣ ତା ଶୋଭାଶିରୀ

ପ୍ରସ୍ତରଖଣ୍ଡର କଳା ଭଗ୍ନସ୍ତୁପ 

ଦେଖିଲେ ହୃଦୟ ହୁଏ ବିଦାରି ।

ରହିଛି ସ୍ମାରକୀ ହସ୍ତୀଶାଳ କୋଠା

ଗିରି ଉଚ୍ଚ ଶିଖେ ଦଶରା ପିଣ୍ଡି

ଭଙ୍ଗା ଦରବାର କାନ୍ଦୁଛି ବାହୁନୀ

ରାଣୀମହଲ ବି ଯାଇଛି ଭାଙ୍ଗି ।

ପ୍ରତୀକ ସ୍ୱରୂପ ଅଛି ମୂଳଭିତ୍ତି

ରାଣୀ ପୁଷ୍କରିଣୀ ପାଣି ଶୁଖିଲା

ରହିଛି ଅନାଇ ସଜଳ ନୟନେ

ପଦମମହଲ ସୁରଙ୍ଗଶାଳା ।

ଦିଶେ ହେମକୂଟ ମାତଙ୍ଗ ପର୍ବତ

ଅଞ୍ଜନୀଗିରି ଓ ଗନ୍ଧମାର୍ଦ୍ଦନ

ସୀତା ହରଣର ସାକ୍ଷୀ ଋଷ୍ୟମୁକ

ରହିଛି ନୀରବେ ଦଣ୍ଡାୟମାନ ।

ଦେବ ବିରୁପାକ୍ଷ ଅଛନ୍ତି ପ୍ରତ୍ୟକ୍ଷ

ସଙ୍ଗେ ବିରାଜିତ ଭୂବନେଶ୍ୱରୀ

ଆଶ୍ଚର୍ଯ୍ୟ ଚକିତ ହୁଅନ୍ତି ଦର୍ଶକ

ଐତିହ୍ୟ କୀରତି ରାଜି ସୁମରି ।

ପ୍ରତ୍ୟୁଷରୁ ସାୟ° ଦିବସ ସମୟେ

ମୁଖ୍ୟ ଗୋପୁରର ଓଲଟ ଛାୟା

ଛିଦ୍ର ମଧ୍ୟ ଦେଇ ମନ୍ଦିର ଗାତ୍ରରେ

ସୃଜେ ପ୍ରତିବିମ୍ବ ଅଦ୍ଭୁତ ମାୟା ।

ଦକ୍ଷିଣେ ପ୍ରସିଦ୍ଧ କର୍ଣ୍ଣାଟ ସାମ୍ରାଜ୍ଯ 

ହୋଇଛି ଖନନ ଧ୍ବଂସାବଶେଷ

ବଖାଣୁଛି ତାର ଅତୀତ ଗୌରବ

ବୀରତ୍ବ ଗାରିମା ଐତିହ୍ଯ ଯଶ ।

ଟେକିଥିଲା ମୁଣ୍ଡ ହୟଶାଳ ପାଣ୍ଡ୍ଯ

ବୀର କାକତୀୟ ରାଜନ ବଂଶ

ସଙ୍ଗମ ଯାଦବ ତୁଲୁବ ସମ୍ରାଟ

କୃଷ୍ଣଦେବ ରାୟ ଥିଲେଟି ଶ୍ରେଷ୍ଠ ।

ରହିଛି ହଜାରି ଶ୍ରୀରାମ ମନ୍ଦିର 

ସରୋବର ପମ୍ପା ତୀର୍ଥ ପବିତ୍ର 

କରିଥିଲେ ମାତା ପାର୍ବତୀ ତପସ୍ୟା

ଲଭିବାକୁ ହର ଶିବଙ୍କୁ ବର ।

ଥିଲେ ଅପେକ୍ଷାରେ ରାମାୟଣ କାଳେ

ମାଆ ଶବରୀ ବି ଏହି ଠାବରେ

ସୁପବିତ୍ର ସ୍ମୃତି କରୁଛି ବହନ

ଅଛି ପଦଚିହ୍ନ ତୀର୍ଥ ସ୍ଥଳରେ ।

ରହିଛି ଗଣେଶ ବିଠଲ ଦେବଙ୍କ

ସୁଦୃଶ୍ୟ ପ୍ରସ୍ତର ଭବ୍ଯ ମନ୍ଦିର 

ବିରାଜୁଛି ମୂର୍ତ୍ତି ଅଞ୍ଜନି ପର୍ବତେ

ପବନୀସୁତଙ୍କ ଯଶ ଅମର ।

ସୁବିସ୍ତୀର୍ଣ ପ୍ରାନ୍ତେ ହେଉଛି ଉତ୍କୀର୍ଣ୍ଣ 

ପ୍ରାଚୀନ ସମୃଦ୍ଧ ବିଜୟ ନଗ୍ର

ପାଇଛି ୟୁନେସ୍କୋ ଐତିହ୍ଯ ମାନ୍ଯତା

ବିଶ୍ବେ ସୁପ୍ରସିଦ୍ଧ ହମ୍ପି ସହର ।

ଝୁରୁଅଛି ମାଟି ପ୍ରାଚୀନ ଐତିହ୍ୟ

ଝୁରୁଛନ୍ତି ପ୍ରିୟ ଦେଖଣାହାରୀ

ସ°ଗ୍ରହାଳୟରେ ମଉନମୁଦ୍ରାରେ

ଆମେ ଜଡ଼ପ୍ରାଣ ମୂର୍ତ୍ତିଟି ପରି । 

ବସନ୍ତୁ ଆସ୍ଥାନେ ବିଠଲ ଶ୍ରୀବିଷ୍ଣୁ

ମିତ୍ର ସୁଗ୍ରୀବୀର ପୁତ୍ର ଅଙ୍ଗଦ

ଉଡାଅ ବିଜୟ ବାନା ବୈଜୟନ୍ତୀ

ରାୟ କୃଷ୍ଣଦେବ ବ°ଶ ଭାରତ ।

ଲେଖା ହେଉ ପୁଣି ସ୍ୱର୍ଣିମ ଅଧ୍ୟାୟ

ହସୁ ତା ମନ୍ଦିର ରାଜ ଉଆସ

ଲଭୁ ପରାଭବ ବିଧର୍ମୀ ଅରାତି

କୁଚକ୍ର କରାଳ କାଳ ରାକ୍ଷସ ।

ଜାଗୁ ରୋମେରୋମେ ଶ୍ରୀରାମ ଚେତନା

ସଞ୍ଜିବୀତ ହେଉ ପ୍ରିୟ ମଣିଷ

ପୁକାରୁ ହୃଦୟ ମୁକ୍ତି ସବୁଜିମା

ଲେଖୁ ତା କଲମ ଗୀତ ନିର୍ଯ୍ୟାସ ।