ରୁକ୍ମୁଣୀଙ୍କ ପତ୍ର
ରୁକ୍ମୁଣୀଙ୍କ ପତ୍ର
ଶ୍ୟାମ ନାଗର ହେ, ଦାସୀଠାରେ କୃପା କର ।
ତୁମେ ମୋ ଠାକୁର ମୁଁ ତୁମ ସେବିକା(୨)
ଏ ପ୍ରାଣ ତୁମ୍ଭ ଆଧାର . .
ଜୀବନ ଯୌବନ ତୁମ ପାଦ ତଳେ(୨)
ସମର୍ପି ଦେଇଛି ମୋର ।
ଶ୍ୟାମ ନାଗରହେ, ଦାସୀଠାରେ କୃପା କର । ୧।
ଭାଇ ମୋର ସାଥେ ଭଗାରୀ ସାଜିଛି
ବିଧି ଅଟେ ବାମ ମୋର,(୨)
ଶିଶୁପାଳ ସାଥେ କରିବାକୁ ବିଭା
ଯୋଜନା ଅଟେ ତାଙ୍କର ।
ଶ୍ୟାମ ନାଗର ହେ, ଦାସୀ ଠାରେ କୃପା କର । ୨।
ମୁହିଁ ତୁମ୍ଭ ଦାସୀ ତୁମେ ମୋର ପ୍ରଭୁ
ମୁହିଁ ସେବିକା କିଙ୍କର,(୨)
ତୁମେ ଥାଉ ଥାଉ ଆଉ କାହାଠାରେ
ମନ ବଳେ ନାହିଁ ମୋର ।
ଶ୍ୟାମ ନାଗର ହେ, ଦାସୀଠାରେ କୃପା କର ।୩ ।
ଶୟନରେ ତୁମେ ସ୍ୱପନରେ ତୁମେ
ତୁମ ନାମ ମାଲା ମୋର,(୨)
ଦିବାରାତି ଯାଏ ତୁମଗୁଣ ଗାଇ
ଆହେ ପ୍ରଭୁ ଚକ୍ରଧର ।
ଶ୍ୟାମ ନାଗର ହେ, ଦାସୀଠାରେ କୃପା କର । ୪।
ଦୟାର ଠାକୁର ଅଟପରା ତୁମେ
ଭକତ ହୃଦୟହାର,(୨)
ସେଥିପାଇଁ ପ୍ରଭୁ ଭଲ ମୁଁ ପାଇଛି
ଆହେ ପ୍ରଭୁ ଦାମୋଦର ।
ଶ୍ୟାମ ନାଗର ହେ, ଦାସୀଠାରେ କୃପା କର ।୫ ।
କରିଅଛି ପ୍ରଭୂ ତୁମ୍ଭଙ୍କୁ ଭରଷା
ଆସିବ କୁଟିରେ ମୋର,(୨)
ନେଇଯିବ ମୋତେ ତୁମ ସଙ୍ଗତରେ
ହେପ୍ରଭୁ ରସଶେଖର ।
ଶ୍ୟାମ ନାଗର ହେ, ଦାସୀଠାରେ କୃପା କର । ୬।
ପାଇଣ ପତର ଆସିବ ଝଟତି
ଏତିକି ଗୁହାରୀ ମୋର,
କରିଅଛି ଆଶା ଶ୍ରୀ ପଦ୍ମପାଦକୁ
ତୁମେ ମୋ ହୃଦଠାକୁର ।
ଶ୍ୟାମ ନାଗର ହେ, ଦାସୀ ଠାରେ କୃପା କର । ୭।
ଜଳ ବିନା ଯେହ୍ନେ ମୀନର ଅବସ୍ଥା
ତେସନେ ଅବସ୍ଥା ମୋର,
ନିରାଶ କରିବ ଯେବେ ପ୍ରାଣନାଥ
ନିଶ୍ଚେ ତେଜିବି ଶରୀର ।
ଶ୍ୟାମ ନାଗର ହେ, ଦାସୀଠାରେ କୃପା କର ।୮ ।