ସ୍ୱର୍ଗକୁ ନିଶୁଣି

ସ୍ୱର୍ଗକୁ ନିଶୁଣି ନିର୍ମାଣ ସମ୍ଭବ

ଏକଥା ସମ୍ପୂର୍ଣ୍ଣ ମିଛ

ମନ ଲୋଭାଣିଆ ଆକାଶ କଇଆଁ

ହ୍ରଦ ଚିଲିକାର ମାଛ ।

ତ୍ରିପୁର ବିଜୟୀ ସମ୍ରାଟ ରାବଣ

ମନେ କାଳେ ଥିଲା ପାଞ୍ଚି

ଜୀଇଁ ଥାଉ ଥାଉ ସ୍ୱର୍ଗକୁ ନିଶୁଣି

ତିଆରିବ ବଳ ସଞ୍ଚି ।

ନୋହିଲା ସମ୍ଭବ ତା ଜୀବଦ୍ଦଶାରେ

ଅତି ଦର୍ପେ ହତ ଲଙ୍କା

ନିହତ ହୋଇଲା ରାକ୍ଷସ ରାବଣ

ଉଦ୍ଧାର ପାଇଲେ ସୀତା ।

ଯାହାକୁ ଯେପରି ଗଢିଛି ଦଇବ

ଭଲ ସ୍ୱସ୍ଥିତି ସ୍ୱଭାବ

ଅତି ଉଚ୍ଚାକାଂକ୍ଷା କଳ୍ପନା ବିଳାସ

ମରୀଚିକା ଅବାସ୍ତବ ।

ମରଣ ଲୋକର ଆମେ ତ ମଣିଷ

ରକ୍ତ ମାଂସ ଦେହ ବହି

ବଞ୍ଚିବୁ ଆନନ୍ଦେ କୁହୁଡ଼ି ପହଁରି

ସ୍ୱର୍ଗ ଚଢ଼ା ଲାଭ ନାହିଁ ।