💐ୠତୁରାଜ ବସନ୍ତ💐

ଋତୁ ଚକ୍ରେ ପରା ପୃଥିବୀ ମଣ୍ଡିତ

ଷଡ଼ଋତୁର ଯେ ଧାରା

ସେ ଧାରାରେ ଜୀବ ଜୀବନ ଚାଲିଛି

ୠତୁ ରଖେ ସ୍ଵତନ୍ତ୍ରତା ।

ଋତୁ ନାମ ନେଇ ପ୍ରତି ଋତୁ ଆସେ

ବସନ୍ତ ଋତୁ ଯେ ରାଜା

ବରଷା ନାହିଁ କି ଖରା ଟାଣ ନାହିଁ

ପ୍ରକୃତିରେ ସାଜ ସଜ୍ଜା ।

ଆକାଶ ଦିଶଇ କେତେ ନିରିମଳ

ଶୀତ ତ ଲୁଚିଲାଣି 

ବିଦାୟ ନେଉଛି ବୋଲି ଏ ଧରାରୁ

କାକର ଢାଳି କାନ୍ଦୁଛି ।

ଋତୁରାଜ ଆସି ସୁ ରାଜୁତି କଲା

ଶୁଷ୍କ ତରୁ କଅଁଳିଛି

ଆମ୍ବ ବଉଳର ମହକେ ମହକେ

ୠତୁ ରାଜ ଆସି ଅଛି ।

ପୃଥିବୀ ର ମୁଖେ ହସ ଫୁଟିଲାଣି

ସବୁଜ ଶାଢୀ ରେ ଉଭା

ବିଭିନ୍ନ ଜାତିର ପୁଷ୍ପ ସ୍ତବକରେ

ଧରଣୀର ହୁଏ ପୂଜା ।

ଦକ୍ଷିଣା ପବନ ଦେହ ସୁହାଉଛି

ଅପରୂପ ଧରା ଶୋଭା

ଆମ୍ର ତରୁ କୁଞ୍ଜେ ପଞ୍ଚମ ତାନରେ

ପିକ ସ୍ଵର ମନଲୋଭା ।

ଜୁଇ, ଜାଇ,ମଲ୍ଲୀ ,ଚମ୍ପା ପୁଷ୍ପ ସଙ୍ଗେ

ପୁଷ୍ପ ମଣ୍ଡିତ ପୃଥିବୀ

ଋତୁରାଜ ଦିଏ ପ୍ରୀତିର ବାରତା

ପୃଥିବୀ ପ୍ରୀତି ବାଣ୍ଟୁଛି ।

ଗ୍ରୀଷ୍ମପ୍ରବାହର କଷ୍ଟ ନାହିଁ ଆଜି

ଝଡି ବରଷା ବି ନାହିଁ

ଶୀତର ପ୍ରକୋପ ମୁହଁ ଲୁଚାଇଛି

ପୃଥିବୀ ହସି ଉଠୁଛି ।

ଋତୁରେ ଋତୁ ତ ବସନ୍ତ ଅଟଇ

ରାଜକୀୟ ତାର ଶୋଭା

ଚତୁର୍ଦ୍ଦିଗ ହସେ ଆନନ୍ଦେ ବିଭୋରେ

ବାଣ୍ଟିଣ ବସନ୍ତ ବାର୍ତ୍ତା ।

ଋତୁରେ ଋତୁ ଏ ବସନ୍ତ ଆସଇ

ସଙ୍ଗେ ଦୋଳ ହୋଲି ନେଇ

ଗାଁ ଦୋଳବେଦୀ ଉତ୍ସବ ମୁଖର

ଦୋଳିରେ କହ୍ନେଇ ରାଇ । 

ଋତୁରାଜ ଆସେ ନିର୍ମଳତା ନେଇ

 ଚଉଦିଗ ନିରିମଳ

ମନ ମୋହି ନିଏ ୠତୁ ରାଜ ପୁଣି

ସମସ୍ତେ ଚଳ ଚଞ୍ଚଳ ।

ଋତୁ ମଧ୍ୟେ ଶ୍ରେଷ୍ଠ ଏଇ ଯେ ବସନ୍ତ

ଅପୂର୍ବ ତା ଶୋଭା କାନ୍ତି

ପୃଥିବୀ ସୁନ୍ଦର ଜୀବନ ସୁଖଦ

ବରଷୁ ଥାଏ ସେ ଶାନ୍ତି ।

ବସନ୍ତ ଋତୁ ଯେ ଉତ୍ସବ ମୁଖର

ଦୋଳ ହୋଲି ଯେ ଜାଗର

ବସନ୍ତ ପଞ୍ଚମୀ ଶ୍ରୀରାମ ନବମୀ 

କରେ ତତ୍ତ୍ଵର ବିଚାର ।

ପରିବେଶ ଏବେ ବଦଳେ ପୃଥ୍ୱୀରେ

ଋତୁ ଅନୁଭବ କମେ

ବସନ୍ତ ରାଜାର ରାଜୁତି କମିଛି

ଦେଖା ଦିଏ ଚାଲିଯାଏ ।

ଋତୁ ସ୍ଥିତି ସଙ୍ଗେ ଆମେ ବି ଜଡିତ

ଆହାର ବିହାରେ ଲୋଡ଼ା

ପରିବେଶ ଆଜି ସମୃଦ୍ଧି ଚାହୁଁଛି

ଜନ ସହଯୋଗ ଲୋଡ଼ା ।