Library
Profile
ରକ୍ଷା ବନ୍ଧନ
ରକ୍ଷା ବନ୍ଧନ
ଶାନ୍ତିର ଭୁବନ ବିଶ୍ଵର କଲ୍ୟାଣ
ଯେବେ ଏକ ସୂତ୍ରେ ବନ୍ଧା
ସ୍ନେହ ପ୍ରେମ ମୈତ୍ରୀ ଦୃଢ଼ ଭାତୃ ଭାବ
ପରସ୍ପରରେ ମନ ଛନ୍ଦା ।
ଦେଶ ଦେଶ ମଧ୍ୟେ ଜାତି ଜାତି ମଧ୍ୟେ
ପ୍ରଥା ପରମ୍ପରା ଶ୍ରେଷ୍ଠ
ଓଡ଼ିଆ ଜାତିର ଶ୍ରେଷ୍ଠ ପରମ୍ପରା
ରକ୍ଷା ବନ୍ଧନ ଉଦ୍ଦିଷ୍ଟ ।
ସ୍ନେହର ସୁଦୃଢ଼ ରଜ୍ଜୁ ହୁଏ ଦୃଢ଼
ଭାତୃ ଭଗିନି ସମ୍ବନ୍ଧେ
ସ୍ନେହର ଡୋରିଟେ ବାନ୍ଧି ଦିଏ ହାତେ
ମଙ୍ଗଳ ମନାସି ହୃଦେ ।
ଶ୍ରୀ ବଳଦେବଙ୍କ ଜନ୍ମ ତିଥି ଅଙ୍କ
; ଶ୍ରେଷ୍ଠ ଶ୍ରାବଣ ପୂର୍ଣ୍ଣିମା
ଓଡ଼ିଆ ସଂସ୍କୃତି ସ୍ନେହ ପ୍ରେମ ପ୍ରୀତି
ମୈତ୍ରୀ ଭାବର ବନ୍ଧନ ।
ସ୍ନେହର ପସରା ଡୋରି ଦିଶେ ତୋରା
ବାନ୍ଧି ଭାତୃ ହସ୍ତେ ଭଗ୍ନୀ
ଶପଥ ନିଅଇ କବଚଟେ ହୋଇ
ପ୍ରଥା ପରମ୍ପରା ମାନି ।
ନୁହେଁ ସେ ସୂତାଟେ ଅତୁଟ ବନ୍ଧଟେ
ବାନ୍ଧି ଦିଏ ଭାତୃ ମନେ
ଆସୁ ଝଡ଼ ଝଞ୍ଜା ନାହିଁ ପଛ ଘୁଂଚା
ଭାଇର ଭଗ୍ନୀ ଜୀବନେ ।
ଗୋଟିଏ ଗର୍ଭରୁ ଗୋଟିଏ ରକ୍ତରୁ
ଗୋଟିଏ ସୁତାର ଭାବ
ଓଡ଼ିଆ ସଂସ୍କୃତି ନିଦର୍ଶନ ଏହି
ରକ୍ଷା ବନ୍ଧନ ପରବ ।
