Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Anita Dash

Inspirational Others


4.3  

Anita Dash

Inspirational Others


ମଣିଷ ପରିକା ମଣିଷଟେ ଥାଅ ରହି

ମଣିଷ ପରିକା ମଣିଷଟେ ଥାଅ ରହି

2 mins 101 2 mins 101

ସତ୍ୟ ସଦାଚାର ସୁନୀତି ସଜିତ

ସଜ୍ଜନଙ୍କ ବ୍ୟବହାର,

ଦୂର୍ଜନଙ୍କ ପ୍ରିୟ ମିଥ୍ୟା ପ୍ରତାରଣା

ଛଳନା ଓ ବ୍ୟଭିଚାର ।


ଯୋଗ୍ୟ ବ୍ୟକ୍ତି ଠାରୁ ଉଚ୍ଚ ଆଶା କଲେ

ମିଳିଥାଏ ଉଚ୍ଚ ମାନ,

ଅବିବେକୀ ଠାରୁ ବିବେକ ଇଛିଲେ

ଉଣା ହେବ ସିନା ମନ ।


ସାଗର ଜଳରୁ ତୃଷ୍ଣା ମେଣ୍ଟାଇବା

ପାଇଁ ବଳାଇଲେ ମତି,

ବିଷାକ୍ତ ସର୍ପକୁ ଖଣ୍ଡ କ୍ଷୀର ଦେଇ

ରଖିଲେ ଆପଣା କତି।


ଲଭିବ ଦୁର୍ଦ୍ଦଶା ହେବ ହଟହଟା

କଣ୍ଠାଗତ ହେବ ପ୍ରାଣ ,

ଆଶା ଖାଲି ସିନା ଆଶାରେ ରହିବ

ଲକ୍ଷ୍ୟ ନୋହିବ ପୂରଣ ।


ଛାଗଳକୁ ଯେତେ ମେରି ବୁଲେଇଲେ

ମକଚି ହେବକି ଧାନ,

ମିଷ୍ଟ ଫଳ ନେଇ କାକକୁ ଖୋଇଲେ

ଗାଇବକି ରାମ ନାମ ।


ଚଣ୍ଡାଳକୁ ବେଦଜ୍ଞାନ ଶିକ୍ଷା ଦେଇ

ଅନ୍ଧକୁ ଦେଇ ଦର୍ପଣ ,

ମାଙ୍କଡ଼ ଗଳାରେ ରତ୍ନ ହାର ଦେଇ

ହୁଅନାହିଁ ହତଜ୍ଞାନ ।


ସ୍ୱଭାବକେ କାର ସହଜେ ଛାଡିଛି

ସେତ ଜନ୍ମଗତ ରୋଗ ,

ନହୋଇ ନିର୍ବୋଧ ଆରେ ହତଭାଗା

ଚୈତନ୍ଯକୁ ଟିକେ ଜାଗ।


ଏତ ମାୟାଜାଲ ସବୁଠି ଭେଜାଲ

ପିୟୁଷେ ମିଶଇ ବିଷ,

ଚିଜ ନ ପରଖି ପିୟୁଷ ପିଇଲେ

ପିଣ୍ଡୁ ପ୍ରାଣ ହେବ ନାଶ ।


ନକଲି ଚମକେ ଦାଉଦାଉ ହୋଇ

ବେଢେଇ କଲେଇ ପୁଟ୍ଟି,

ନିଷ୍ପନ୍ଦ ନିଷ୍ପ୍ରଭ ଅସଲି ଯାଇଛି

ମନସ୍ତାପେ ଏଠି ଲୁଚି ।


ଲୋକ ଜାଣିବାକୁ ସତ୍ୟର ବିଜୟ

ମିଥ୍ୟା ପିନ୍ଧେ ସତ୍ୟ ମୁଖା ,

ଆତ୍ମ ପ୍ରବନଞ୍ଚନା ବୁଲି ବୁଲି ମାଗେ

ଆତ୍ମ ସମ୍ମାନର ଭିକ୍ଷା ।


କାଚକୁ ନଦିଅ କାଞ୍ଚନର ମୂଲ

ହୀରାକୁ ନମଣ ଗୋଡି,

ଉଚିତକୁ ଦିଅ ଉଚିତ ବେଭାର

ତୃତୀୟ ନୟନ ଖୋଲି ।


ଜ୍ଞାନ ମନ ମୁନ ଧନ ଯଉବନ

ସତପାତ୍ରେ ଦିଅ ଦାନ,

ଅପାତ୍ରରେ ଦେଇ ଅସନ୍ତୋଷ ବୋହି

ହୁଅନାହିଁ ହୀନିମାନ।


ମନ ଭୂଲାଣିଆ ଛଇ ଛବି ଦେଖି

ହେତୁକୁ ନଯାଅ ଭୁଲି,

ଚେତନା କଷଟି ପଥରେ ପରଖ

କିଏ ସୁନା କିଏ କଲି ।


ପରଖି ନହେଲେ ଚୁପ୍‌ଚାପ୍ ବସ

ଉଲ୍ଲୁକ ପରି ଚାହିଁ,

କେ ପାଣି ଅବା କୁଆଡେ ଯାଏ ବହି;

ସୁଅରେ ନଯାଅ ବୋହି।


ଯଶ ଖ୍ୟାତି ସ୍ଥିତି ପାଇଁକି ତିଳେହେଁ

ସ୍ୱତନ୍ତ୍ରତା ଭୁଲ ନାହିଁ;

ଆତ୍ମ ସମ୍ମାନ ଓ ନୈତିକତା ଜଗି

ମଣିଷଟେ ଥାଅ ରହି ।

ମଣିଷ ପରିକା ମଣିଷଟେ ଥାଅ ରହି ।


Rate this content
Log in

More oriya poem from Anita Dash

Similar oriya poem from Inspirational