🍁 ହେମନ୍ତ ଆସେ 🍁

 ଶରତ ଶେଷେ   ହେମନ୍ତ ଆସେ

       ଶିଶିର ବିନ୍ଦୁ ବୁଣି

   ଜୋଛନା ତାଳେ  ଝଲକ ଝରେ

       ହୀରକ ସମ ପୁଣି ।।

   ଆଡ ନୟନେ ତେରେଛା ଚାହେଁ

       ଅରୁଣ ପୂର୍ବ ଦିଗେ

   ସପତ ରଙ୍ଗେ    ମଣି ଝଲକେ

        ଦୂର୍ବାଦଳର ଅଙ୍ଗେ ।।

   କଅଁଳ ଖରା   ପରଶେ ତୋରା

       ବିହଙ୍ଗେ ଡେଣା ଝାଡି

   ଆନନ୍ଦ ରବେ   ଯାଆନ୍ତି ସର୍ବେ

       ଦୂର ଆକାଶେ ଉଡ଼ି ।।

   ନ ଥାଏ ଖରା   ବରଷା ଧାରା

       କଅଁଳ ଶୀତ ଧରି

   ମଳୟ ବହେ   ଅନଙ୍ଗ ଦହେ

       ଲାଗେ ଚନ୍ଦନ ପରି ।।

Advertisement

   ଧରମ ମାସେ   ଧରିତ୍ରୀ ହସେ

       ପ୍ରାତଃ ସ୍ନାହାନ ସାରି

   ହବିଷ ପାଳି    ବିଧବା ନାରୀ

        ଦିଅନ୍ତି ହୁଳହୁଳି ।।

   ସକାଳ ସଞ୍ଜେ   ମନକୁ ରଞ୍ଜେ

      ଆଳତୀ ଦେବାଳୟେ

   ରାହାସ କୁଞ୍ଜେ ଶ୍ରୀ କୃଷ୍ଣ ବିଜେ

      ତ୍ରିଭଙ୍ଗୀ ଠାଣି ଲୟେ ।।

   ପାଚିଲା କ୍ଷେତେ ଫସଲ ହସେ

       ହଳଦୀ ଗୁରୁ ଗୁରୁ

   ବାଇ ଚଢ଼େଇ କେଣ୍ଡାରୁ ଡେଇଁ

       ଉଡ଼ଇ ଫୁରୁ ଫୁରୁ ।।

   ମନ ହରଷେ   ଗଣିତ କଷେ

       ଚାଷୀ ଭାଇଟି ବସି 

   ଶ୍ରମର ଫଳ   ଭରେ ଉଦର

       ଜଗତ ହେବ ଖୁସି ।।