ପ୍ରତିଶୋଧ

ମନରୁ ଯାଏନି କିଛି ହୃଦୟର କଥା

ମନତଳେ ଯାହା ସାଇତା

ଅକୁହା ବେଦନା ସମ୍ବଳିତ ସ୍ମାରକ

ଲୁକ୍କାୟିତ ଅବ୍ୟକ୍ତ ବାର୍ତ୍ତା ।

ଆଖି ଆଗରେ ନିତି ନାଚିନାଚି ଯାଏ

ଦିଶେ ପୁଣି ଦିବା ସ୍ୱପ୍ନେ

ଆଖି ଲୁହ ଧାରେ ନିଜର କାହାଣୀ

କାନ୍ଦୁଥାଇ ବସି ଗୋପନେ ।

ଛାତି ଚିରିଦେଇ ଦେଖିପାର ତୁମେ

ରହିଛି ଯେତେକ କଷଣ

ନିଜେ ଦୋଷୀ ସାବ୍ୟସ୍ତ ହୋଇଛି ତଥାପି

ପ୍ରତିଶୋଧର ଖୋଜିନି କାରଣ ।

କିଛି ଆଶା ବିଶ୍ୱାସ ପଛରେ ରହିଛି

ଛଳନା ଭରା ବିଶ୍ୱାସଘାତକ

ବାସ୍ତବତା ଆଗେ ନୀରବି ଯାଇଛି

ଅଲୋଡା ଜୀବନ ଜାତକ ।

ମନ ସିନ୍ଦୁକରେ କେତେ ଯେ ଯାତନା

ଅଛି ପୁଣି ଅନେକ ସ୍ମୃତି

ପରଦା ପଛରେ ଆତ୍ମହତ୍ୟା କରେ

ହେବାକୁ ପାଉଁଶ ଇତି ।

କହିପାରେ ନାହିଁ ସହିପାରେ ନାହିଁ

ଚାପିରଖେ ଛାତିତଳେ

ନିଃଶ୍ୱାସ ବାହାରେ ଗଣୁଥାଏ ବସି

ସମୟର ଅପେକ୍ଷାରେ ।