କିଛି ହାର୍ ଲଢ଼ିବା ଶିଖାଏ

କିଛି ହାର ଜୀବନରେ ଲଢ଼ିବା ଶିଖାଏ

କିଛି ସଜାଇଦିଏ ଦୋଷୀ

ଆୟୁଷ ରେଖା ବଞ୍ଚିବା ବାହାନାରେ

ଧିରେ ଧିରେ ଯାଏ ଖସି ।

କିଛି ହସ ମୁଖେ ଦୁଃଖକୁ ଭୁଲାଏ

କିଛି ଝରେ ଆଖି ଲୁହେ

ଅନ୍ୟ ପାଇଁ ନିଜେ ସଳିତା ସାଜି

ଜଳୁଥାଏ ନିଜେ ନିଜ ଦେହେ ।

କିଛି ସ୍ମୃତି ମନେପଡେ ଦୁଃଖ ଭୁଲେଇ

ଭୁଲିବାକୁ ଆରମ୍ଭ ଅତୀତ

ଗଢ଼ିବାକୁ ଆଉ ଏକ ନୂଆ ସ୍ଵପ୍ନପୁରୀ

ଆଖି ପରଦାକୁ କରି ପଣତ ।

କିଛି ସତ କେବେ ଲୁଚି ବସିରହେ

ମିଛ ମାୟା ଆଢ଼ୁଆଳେ

ଅନ୍ଧାରୀ ମୁଲକରେ ଆଲୋକର ଶିଖା

ଶେଷ ଚିତା ଜଳିବା ଯାଏଁ ।

କିଛି ବାଟ ଚାଲୁ ଚାଲୁ ବାଟବଣା ହୁଏ

ଜୀବନର ଚଲାପଥେ

ଚିହ୍ନା ପଡ଼ିଥାଏ ବନ୍ଧା ଅଚିହ୍ନା ପାଖରେ

ଶେଷ ମୁହୂର୍ତ୍ତର ଅପେକ୍ଷାରେ ।

କିଛି ପୁଣ୍ୟ ଆଶେ ପାପ ଅର୍ଜୁଥାଏ

ନଥାଏ ପାଖେ ଉତ୍ତର

ପ୍ରତ୍ୟେକ ମୁହୂର୍ତ୍ତରେ ଘୁରି ବୁଲୁଥାଏ

ମାଗି ମାଗି କ୍ଷମା ବର ।