ପରମ ପୁରୁଷ ତୁମକୁ ସଜାଇ କି ଲାଭ ପାଇଲି କୁହ

ପରମ ପୁରୁଷ ତୁମକୁ ସଜାଇ

କି ଲାଭ ପାଇଲି କୁହ

ହସର ତୁଣ୍ଡକୁ ଏମିତି ଦଣ୍ଡିଛ

ଆଖିରୁ ଗଡୁଛି ଲୁହ

............ପରମ ପୁରୁଷ ତୁମକୁ ସଜାଇ

             କି ଲାଭ ପାଇଲି କୁହ ! ୦ !

ପ୍ରେମର ମନ୍ଦିରେ ଦେବତା ଥାପିଲି

ଭକତି ଦୀପକୁ ଜାଳି

ବୁଝି ବି ଅବୁଝା ରହିଲ ଯାହା ହେ

ନିଜକୁ ଖାଉଛି ଗାଳି

ତଥାପି ଛାଡୁନି ମନର ଭିତରୁ

ତୁମରି ନାମର ମୋହ

............ପରମ ପୁରୁଷ ତୁମକୁ ସଜାଇ

             କି ଲାଭ ପାଇଲି କୁହ ! ୧ !

ମନର ଫୁଲକୁ ବନ୍ଦାଇ ଦେଇଛି

ଗାଉଛି ଜୀବନ ଗୀତ

ଆଶିଷ ଦେବାରେ ହେଳାକୁ କରୁଛ

ସତରେ ପରାଣ ମିତ

କେମିତି ଆଉ ମୁଁ ଏକାକୀ ରହିବି

କାଠକୁ କରିକି ଦେହ

ଦେହରୁ ଆତ୍ମା ମୋ ଛାଡ଼ିକି ଯାଉଛି

କରିବ ଏଥର ଦାହ

............ପରମ ପୁରୁଷ ତୁମକୁ ସଜାଇ

             କି ଲାଭ ପାଇଲି କୁହ ! ୨ !