ପ୍ରେମ ଆଶେ

ତୁମ ପ୍ରେମ ପ୍ରାପ୍ତି ଆଶେ

ପ୍ରତୀକ୍ଷା ପରୀକ୍ଷା କି ସେ

ବଞ୍ଚିଛି କେମିତି ଜାଣ

ଘଡିକୁ ଘଡି ଛାଡେ ପରାଣ।

ତୁମ ବାଟ ଚାହେଁ ଯେହ୍ନେ

ଚକୋରି ନିତି ବାହୁନେ

ପ୍ରାଣ ପ୍ରିୟ ତୁମେ ମୋର

ଦେବତା ପାଦେ ଲୋଡ଼େ ଆଶରା।

ତୁମ ମନର ବାରତା

ନଜାଣି ପାଏ ମୁଁ ବ୍ୟଥା

କେମିତି ବଞ୍ଚିବି କୁହ

ପ୍ରେମ ବିହୁନେ ଝରାଏ ଲୁହ ।

ପ୍ରାଣ ସଖା ତୁମ ଅପେକ୍ଷା

ସତେ କି ପ୍ରାପତ ହୋଇବ ଦେଖା

ପବନରେ ଖୋଜେ ପୁଣି ସପନରେ ଖୋଜେ

ତୁମ ପ୍ରତି କଥା ଭାବି ନିଜ ଭାବନାରେ ହଜେ ।

ତୁମ ପ୍ରେମ ଦ୍ୱାହି ଦେଇ

ବଞ୍ଚି ଅଛି ତୁମରି ପାଇଁ

ତୁମ ପାଇଁ ମୋର ମୂଲ

ଜାଣିଛି ମୁଁ ବାସହୀନ ଫୁଲ ।

ସରଗ ଚାନ୍ଦ ମୋ ପାଇଁ

ତୁମ ପ୍ରେମ ଦୂରୁ ଝୁରେ ମୁହିଁ

କହି ମୁଁ ରଖୁଛି କଥା

ମୋ ପ୍ରେମର ଗଭୀରତା ।

ଆସିବ ଦିନେ ସମୟ

ମୋ ପାଇଁ ତୁମ ପ୍ରାଣ ଅଥୟ

ସେଦିନ ଯେବେ ନଥିବି ପାଶେ 

ଖୋଜିବ ମୋ ଅନ୍ତିମ ଦେଶେ ।

ଧନ୍ୟ ହୋଇବ ମୋ ପ୍ରେମ

ତୁମ ଆଖିଲୁହ ସ୍ପର୍ଶ 

ମୋ ପାଇଁ ହିଁ ଶେଷ କାମ୍ୟ ।।