ପଳାତକ

ଜୀବନ ଯୁଦ୍ଧ ର ପଳାତକ ତୁମେ

ଅନ୍ଧ ଗଳି ର ଯାତ୍ରୀ

ଜୀବନର ମୂଲ୍ୟ ନ ବୁଝିଛ ଯଦି

ମରଣେ କି ଅଛି ମୁକ୍ତି ।

ବଞ୍ଚିବାର ମାନେ ଜୀବନ ସଂଗ୍ରାମ

ହାରିବା ଜିତିବା ଖେଳ

ହାରିବା ଭିତରେ ଲୁଚିରହି ଥାଏ

ଜିତିବାର କଉଶଳ ।

ଇଚ୍ଛା ସାଜେ ନାହିଁ କାମଧେନୁ କେବେ

ସୁଖ ଆପେ ମିଳିଯିବ

ସଂସାର ସମୁଦ୍ର ମନ୍ଥନ ନ କଲେ

ସୁଖ କିବା ପ୍ରାପ୍ତ ହେବ ।

ଦୟା କ୍ଷମା ଶାନ୍ତି ଧାର୍ଯ୍ୟ ସହିଷ୍ଣୁତା

ପଞ୍ଚ ଗୁଣ ଥିଲେ ରହି

ଯେତେ ଝଡ଼ ଖଞ୍ଜା ଆସିବ ଜୀବନେ

ଆପେ ଆପେ ଯିବ ବହି ।

ଇନ୍ଦ୍ରିୟ ସଂଯତ କରି ପାରେ ଯିଏ

ଷଡରିପୁ ହୁଏ ଜୟ

ନୀରବ ଧ୍ୟାନ ରେ ସମାଧି ଆସନେ

ପ୍ରବୃତ୍ତି ର ପରାଜୟ ।

ଆତ୍ମ ହତ୍ୟା କେବେ ନୁହେଁ ଶ୍ରେୟ ପଥ

ସମସ୍ୟାର ସମାଧାନ

ନିଜେ ତ ମରିବୁ ମରଣ ଯନ୍ତ୍ରଣା

ଭୋଗିବେ ତୋ ପ୍ରିୟ ଜନ ।

କୋଟି ପୁଣ୍ୟ ବଳେ ମଣିଷ ଜନମ

ଅଟେ ଈଶ୍ୱରଙ୍କ ଦାନ

ଜୀବନ ଯୁଦ୍ଧ ରୁ ପଳାତକ ହେଲେ

ନର୍କେ ବି ମିଳେନି ସ୍ଥାନ ।