ଅଣସର ଘରେ କାଳିଆ

ଅଣସର ଘରେ ଶୋଇଛୁ କାଳିଆ

ଦେହେ ଖଇଫୁଟା ତାତି

ଦେଖି ତୋ କଷଣ କାଳିଆ ସୁନାରେ

ଫାଟି ଯାଏ ମୋର ଛାତି ।

ନିଜେ ତୁ କାଳିଆ ନିଜର କରତା

ନିଜକୁ କଷଣ ଦେଇ

ଜଗତ ଜନକୁ ଦେଖାଉଛୁ କିବା

ଦେହ ଥିଲେ କଷ୍ଟ ପାଇ ?

ଅମାନିଆ ହୋଇ ସ୍ନାନ ମଣ୍ଡପରେ

ଘଧୋଇଲୁ କିଆଁ ଏତେ

ସେ ଲାଗି ଭୀଷଣ ଜ୍ବରର କଷଣ

ଭୋଗ ହୁଏ ଆଜି ତୋତେ ।

ଜଡ଼ି ବୁଟି ପଥି ମୋଦକ୍ ବଇଦେ

ସେବନ୍ତି ସେବକ ଦ୍ୱିଜ

ସଅଳ ସଅଳ ଉଠିଯା ଅ ଧନ

ବଡ଼ଦାଣ୍ଡେ ରଥ ସଜ ।

ଚାହିଁଛନ୍ତି ଭକ୍ତ ଟାଣିବେ ତୋ ରଥ

 ନେବେ ତତେ ଭିଡ଼ି ଭିଡ଼ି

ଟାହିଆ ପକେଇ ଝୁଲି ଝୁଲି ଯିବୁ

ପଣ୍ଡା ଛାଡୁଥିବେ ରଡ଼ି।

ମାଉସୀ ଘରକୁ ବୁଲିବାକୁ ଯିବୁ

ଭାଇ ଭଉଣୀ କୁ ଧରି

ମାଉସୀ ମା " ତୋର ଚାହିଁ ବସିଅଛି 

କ୍ଷୀରି ପୋଡ଼ ପିଠା କରି ।