ଆସ ପରଂବ୍ରହ୍ମ

ଶ୍ରୀ ମନ୍ଦିର ଏବେ ଖାଲି ପଡ଼ି ଅଛି

ବଡ଼ଦାଣ୍ଡ ମରୁବାଲି

ମୁଦି ରଥ ପଣ୍ଡା ତୁଣ୍ଡ ଶୁଭୁ ନାହିଁ

ଉଠ ଉଠ ପ୍ରଭୁ ବୋଲି ।

କନକ ପଲଙ୍କ ଖାଲି ପଡ଼ିଅଛି

କମଳା ଙ୍କ ଅଙ୍କ ଶୁନ୍ୟ

ରାଗ ଅଭିମାନ ହେଲାଣି ଜମାଟ

ଭଣ୍ଡାରେ ଲାଗୁନି ମନ ।

ଛ ଦିନ କହି ନଅ ଦିନ ହେଲା

 ନ ଆସିଲେ ନୀଳମଣି

ପତି ବିରହ ରେ ଦିନ କାଟୁଛନ୍ତି

ଶ୍ରୀ ମନ୍ଦିର ସାଆନ୍ତାଣୀ ।

ତ୍ରିଫଳା ର ଜଳ ହେଉ ନାହିଁ ଲୋଡ଼ା

 ମୁଖ ଲାଗି ସ୍ନାନ ପାଇଁ

ଷାଠିଏ ପଉଟି ଭୋଗ ହେଉ ନାହିଁ

ଯେବେଠୁ ଗଲେଣି ସାଇଁ ।

ଜନମ ବେଦୀରେ ଭୁଲି ଗଲ କିବା

ଜୀବନ ଜଞ୍ଜାଳ କଥା

କୋଟିଏ ଭକତ ଚାହିଁ ବସିଛନ୍ତି

ଜଣାଇବେ ନିଜ କଥା ।

ଆସ ପରମବ୍ରହ୍ମ ଫେରି ଆସ ତୁମେ

ବାହୁଡ଼ା ନିକଟ ହେଲା

ଭକତ ତୁମର ହେଲେଣି ଆତୁର

ଖୋଲ ଶ୍ରୀ ମନ୍ଦିର ତାଲା ।।