ପିଲା ଦିନର ଅନୁଭୂତି

ଆଜି କାହିଁ ମନେ ପଡୁଅଛି ଭାରି

ମୋର ସେ ପୁରୁଣା ଦିନ

ବୋହୁଚୋରି ଖେଳ ସାଙ୍ଗ ସାଥୀମେଳ

ସେ ସୁନ୍ଦର ପିଲା ଦିନ ।

ସଞ୍ଜ ନଇଁ ଗଲେ ଆକାଶରେ ଯେବେ 

ଜହ୍ନ ,ତାରା ଉଇଁ ଆସେ

ଗାଁ ମନ୍ଦିରରୁ ଖଞ୍ଜଣି ଶବଦ

ପବନରେ ଭାସିଆସେ ।

ଭାଇ ଓ ଭଉଣୀ ପଢୁଥିଲୁ ବସି

ଲଣ୍ଠନ ଆଲୁଅ ଜାଳି

ପୁଣି ମନେ ପଡ଼େ ମୋ ମାଆ ର ସେହି

ମଧୁଝରା ମିଠା ଗାଳି ।

ଲଣ୍ଠନର ସେଇ ଫଟାକାଚ ଥିଲା 

ଆମପାଇଁ ଶେଷ ଆଶା

ନଥିଲା ବିଜୁଳି ମନେ କିନ୍ତୁ ଥିଲା

ପାଠ ପଢ଼ିବାର ନିଶା ।

 

ଭାରି ଭଲ ଥିଲା ସେ ପିଲା ବୟସ

ଆସନ୍ତା କି ଥରେ ଫେରି

ବାପାଙ୍କ ଆକଟ ମାଆ ର ସେନେହ

ମନେ ପଡ଼େ ଆଜି ଭାରି ।

ଭାଇ ସାଥେ କଳି, ମାଆ କୋଳେ ଅଳି

କେତେ ମାନ ଅଭିମାନ

ଭାରି ମନେପଡ଼େ ଆଜି ନିରୋଳାରେ

ଅଭୁଲା ସେ ପିଲାଦିନ ।