ଫଗୁଣର ପ୍ରୀତି ଛିଟା

ଫଗୁଣର ପ୍ରୀତି ଛିଟା ଲାଗେ କେତେ ମିଠା 

ଫୁଲ ଫଳ ଭାରେ ଭରା ବିମଳ ବସୁଧା ।

ଫଗୁ ଖେଳ ଦୋଳ ଜାତ ଉତ୍ସବ ପାଳନ

ଫସଲ ଅମଳ ପରେ ଆସେ ଏ ଫଗୁଣ ।

ଫୁରୁ ଫୁରୁ ହୋଇ ମନ ପ୍ରାଣେ ଖୁସି ବୁଣେ

ଫୁଲ ଫଳ ଗନ୍ଧ ସ୍ୱାଦ ମଳୟ ପବନେ ।

ଫର ଫର ଧ୍ଵନି ତୋଳେ ମୃଦୁଳ ଦୋଳନ

ଫୁଲ - ପଲ୍ଲବରେ ମହୀ ବର୍ଣ୍ଣାଢ଼୍ୟ ବରଣ ।

ଫଗୁଣେ କୋକିଳ ଗାଏ ଭ୍ରମର  ବୋବାଏ

ଫୁଲେ ଫୁଲେ ମହୁମାଛି ବସି ମଧୁ ପିଏ ।

ଫଳନ୍ତି ବୃକ୍ଷରେ ଭରେ ବନ ଉପବନ

ଫୁର୍ତ୍ତି ଉତ୍ସାହ ଉଲ୍ଲାସେ ମନ ପ୍ରାଣ ପୂର୍ଣ୍ଣ । 

ଫୁଲ ଗନ୍ଧ , ସାଥେ ସହକାର କଳିକାର

ଫୁର୍ତ୍ତି ଉନ୍ମାଦନା ଭରା ସୁଗନ୍ଧିତ ଧାର ।

ଫଗୁଣରେ ପ୍ରବାହିତ ହୁଏ ଦିଗେ ଦିଗେ

ଫଗୁ ରଙ୍ଗ ଅବିରରେ କି ସୁୁଦିବ୍ୟ ରାଗେ ।

ଫଗୁଣର ପ୍ରୀତି ଛିଟା ଚିଞ୍ଚି ଦିଏ ନିତ୍ୟେ

ଫୁଟି ଉଠେ ମନ ପ୍ରାଣ ଦିବ୍ୟ ଶକ୍ତି ସ୍ରୋତେ ।

ଫଗୁ ଦୋଳ ଜାତ ପାଇଁ କି ବିଜୟ କରି

ଫଗୁଣରେ ରାଧା କୃଷ୍ଣ ଲୀଳା ଥାନ୍ତି କରି ।

ଫର ଫର ଉଡେ ନେତ ବାଜେ ବାଜା ତୂରୀ

ଫଗୁ ଉତ୍ସବରେ ଭକ୍ତେ ମଉଜେ ବିହରି ।

ଫେରନ୍ତି  କାନ୍ଧରେ ଧରି ଦୋଳ ବିମାନକୁ

ଫଗୁଣର ଫଗୁ ଖେଳ ମେଳଣ ଯାତକୁ ।

ଫଗୁଣର ପ୍ରୀତି ସ୍ରୋତ ଧାରେ ପ୍ରବାହିତ

ଫୁଲି ଫୁଲି ନାଚେ ମନ ପ୍ରାଣ ଅବିରତ ।