ଫେରନ୍ତା ଚିଠି

ପାଦରୁ ପାଉଁଜି ଖୋଲିଦେଇ ତୁମେ

ନିରବରେ ଆସିଥିଲ

ଛୁଇଁ ଦେଇ ମତେ ଚାଲିଯିବ ବୋଲି

ମନେ ମନେ ଭାବିଥିଲ ।

ଗୁଞ୍ଜରିତ ତୁମ ପାଦର ଧ୍ବନି ରେ

ନିଦ ମୋର ଭାଙ୍ଗିଗଲା

ପାପୁଲିରେ ମୋର ତୁମରି ହାତର

ସ୍ପର୍ଶ ଖାଲି ରହିଗଲା ।

ଭାବ ରଖିଥିଲି ଭାବନାରେ ଟିକେ

ତୁମକୁ ରଖିବା ପାଇଁ

ଥରେ ଆସିଲନି ଗୋଟିଏ ସ୍ବପ୍ନ ରେ

କେତେ ରାତି ଗଲା ପାହି ।

ଅଧା ଲେଖିଥିଲି ତୁମ ପାଇଁ ଚିଠି

ଅଧା ଦେଇଥିଲି ଚିରି

ଆଜି ବି ତୁମର ଠିକଣା ଖୋଜୁଛି

ପୁରୁଣା ଲଫାପା ଧରି ।

ଉଧାର ରେ ଟିକେ ହସ ଦେଇ ମତେ

କରିଦେଲ ଋଣୀ ସିନା

ତୁମରି ଋଣ ର ମିଛ ଶାନ୍ତ୍ବନା ରେ

ବେଶି ଥିଲା ପ୍ରତାରଣା ।

ନିରୋଳା ରେ ବସି କେତେ ମୁଁ ଭାବିଛି

ଋଣ କୁ ଶୁଝିବା ପାଇଁ

ଯେତେଥର ଚାହେଁ ଆଖିର ଲୁହରେ

ସବୁକିଛି ଯାଏ ଧୋଇ ।

ଶେଷଥର ପାଇଁ ଲେଖିଥିଲି ଚିଠି

ତୁମ ପ୍ରତିକ୍ରିୟା ପାଇଁ

ଆଜି ବି ତୁମର ଫେରନ୍ତା ଚିଠି କୁ

ମନ ମୋ ବସିଛି ଚାହିଁ ।