ଫେରିଆ ମୋ ସାଥି ଝୁରୁଛି ତୋତେ
ଫେରିଆ ମୋ ସାଥି ଝୁରୁଛି ତୋତେ
ସୂରୁଜ ଉଇଁଲେ ସୁନେଲି କିରଣେ
ଝଲସି ଉଠେ ମୋ ଗାଆଁ
ହାତ ଠାରି ମୋତେ ଡାକଇ ପାଖକୁ
କହଇ ଖେଳିବୁ ଆ ।
ଘାସ ପଡିଆର ଚିକିମିକି ଖରା
କଅଁଳା ବାଛୁରୀ ଡିଆଁ
ଉଡି ବୁଲୁଛନ୍ତି କଙ୍କି ପ୍ରଜାପତି
ଧରିବୁ ଗୋଡାଇ ଆ ।
ନଈକୂଳ ପଠା ଗହଳ ଚହଳ
ପକ୍ଷୀ ମାନଙ୍କର ମେଳା
ଉଡି ଯାଉଛନ୍ତି ଗେଣ୍ଡା ଗେଣ୍ଡାଳିଆ
ଗଣିଦେ ପରଟି ଭଲା ।
ଗାଆଁ ଆମ୍ବତୋଟା ଗହଳ ବଗିଚା
ଭିତରେ କୋଇଲି ଲୁଚି
ଗାଇଲାଣି ଗୀତ ମିଠା କୁହୁ କୁହୁ
ଝଡିଲାଣି ଆମ୍ବ ପାଚି ।
ମନେ ପଡିଯାଏ ଆଜି ଅପରାହ୍ନେ
ସଞ୍ଜ ଯେବେ ନଇଁ ଆସେ
ଡାକୁଛି ମୋ ଗାଆଁ ଫେରିଆ ମୋ ସାଥି
ଝୁରୁଛି ତୋତେ ମୁଁ କେତେ ।
------