ଅଭିମାନ
ଅଭିମାନ
କିଏ କାହା ପାଇଁ କରେ ଅଭିମାନ
ନହୋଇ ଥୁଲେ ନିଜର
ନିଜ ଲୋକ ପାଇଁ ଅଭିମାନ କଲେ
ସମ୍ପର୍କ ହୁଏ ମଧୁର ।
ଅଭିମାନିନୀ ସେ ରାଧିକା ସାଜିଲେ
କୃଷ୍ଣଙ୍କର ପ୍ରେମ ପାଇଁ
ନିିବିିଡ ମଧୁର ସମ୍ପର୍କ ହୋଇଲା
ନଜାଣିଛ କହ କେହି ।
କୃଷ୍ଣଙ୍କ ଉପରେ ଅଭିମାନ ଦିନେ
କରିଥିଲେ ଗୋପ ଗୋଈ
ଚନ୍ଦନ ସମାନ ହେଲେ ତ ସେମାନେ
ତାଙ୍କ ସମ କେବା ହୋଇ ।
ଅଭିମାନେ ପ୍ରେମ ବଢେ ନିରନ୍ତର
ନାହିଁ ଏଥିରେ ସନ୍ଦେହ
ଅଭିମାନ କଲେ ପ୍ରଭୁଙ୍କ ପାଖରେ
ତୁଟିଯିବ ମାୟା ମୋହ ।
ପ୍ରଭୁଙ୍କର ମୁହିଁ ପ୍ରଭୁ ମୋ ନିଜର
ଏ ଭାବନା ଦୃୃଢ କର
ତାଙ୍କରି ପ୍ରେମରେ ବୁଡି ନିରନ୍ତର
ଅଭିମାନ କଲେ କର ।
ଅଭିମାନ ତୁମ ନିଶ୍ଚେ ହେବ ଦୂର
ଡୁବିବ ପ୍ରେମ ଜଳରେ
ଦିନୁଁଦିନ ତୁମେ ହେବ ଅଗ୍ରସର
ପ୍ରେମାସ୍ପଦ ପୀରତିରେ ।
ଭକତର ଅଭିମାନ ଭଗବାନ
କେବେ ନପାରନ୍ତି ସହି
ଜଗନ୍ନାଥଙ୍କର ରଥ ଅଟକିଲା
ଭକ୍ତ ସାଲବେଗ ପାଇଁ ।
ବଳରାମ ଦାସ ମହୋଦଧି ତୀରେ
ଗଢିଥିଲେ ବାଲିରଥ
ତାଙ୍କ ଅଭିମାନ ଦେଖି ସେ ରଥରେ
ବିଜେ କଲେ ଜଗନ୍ନାଥ ।
ଅଭିମାନ ମୋର ଦରଶନ ଦେବ
ହୃଦେ ମୋ ହୃଦଠାକୁର
ଧନ ମାନ କିଛି ଲୋଡା ନାହିଁ ମୋର
ଏହି ଅଳି ଶ୍ରୀପୟର ।