ପାହାନ୍ତିଆ ସ୍ୱପ୍ନ
ପାହାନ୍ତିଆ ସ୍ୱପ୍ନ
ପାହାନ୍ତିଆ ସ୍ୱପ୍ନ ହୋଇବ କି ସତ
ତୁମ ସହ ପୁଣି ହେବ ମୋ ପ୍ରେମ ।
କରି ଆଲିଙ୍ଗନ ଦେବି ମୁଁ ଚୁମ୍ବନ
ରକ୍ତିମ ଗୋଲାପି ଅଧରେ ତୁମ ।।
ପାଇ ସ୍ପର୍ଶ ମୋର ଦେହେ ଶିହରଣ
ମନରେ ଆବେଗ ଖେଳିବ ତୁମ ।
ପ୍ରୀତିରେ ହଜିବ ପ୍ରୀତିରେ ଭିଜିବ
ହୃଦ କନ୍ଦରରୁ ପାଇ ମୋ ପ୍ରେମ ।।
ଭୁଲିଯିବ ସବୁ ମାନ ଅଭିମାନ
ଅତୀତ ଘଟଣା ବାଦ ବିବାଦ ।
ହାତେ ହାତ ଛନ୍ଦି ମୋ ସାଥେ ଚାଲିବ
ଆସ୍ଵାଦନା କରି ପ୍ରୀତିର ସ୍ୱାଦ ।।
ହୃଦୟରୁ ଖୁସି ହେବି ମୁହିଁ ଅତି
ଜୀବନରେ ପୁଣି ତୁମକୁ ପାଇ ।
ଭିଜି ଭିଜାଇବି ସାରା ଦୁନିଆକୁ
ନବରସ ତୁମ ଶରୀରୁ ନେଇ ।।
କହିବି ଆନନ୍ଦେ ଦୁନିଆ ଆଗରେ
ତୁମେ ହିଁ କବିତା ପ୍ରେମିକା ମୋର ।
ତୁମ ବିନା ମୋର ଅନ୍ୟ ଗତି ନାହିଁ
ତୁମେ ମୋ ହୃଦୟେ କରିଛ ଘର ।।