ଓଡ଼ିଆ ପୁଅର ଭାଷା
ଓଡ଼ିଆ ପୁଅର ଭାଷା
ଓଡ଼ିଶା ରାଜ୍ୟରେ ଜନ୍ମି ମୁଁ ଓଡ଼ିଆ
ଭାଷା ଅଟେ ମୋ ଓଡ଼ିଆ
କାୟମନୋବାକ୍ୟ ରେ ଓଡ଼ିଆ ଭାଷା
ରଙ୍ଗ ଢ଼ଙ୍ଗ ବି ଓଡ଼ିଆ
ବିଶ୍ବରେ ଗର୍ବିତ ଓଡ଼ିଶା ରାଇଜ
କୀର୍ତ୍ତି ରହିଛି ଅକ୍ଷୁର୍ଣ୍ଣ
ଶ୍ରୀମନ୍ଦିର ଆଉ କୋଣାର୍କ ଗରିମା
ଓଡ଼ିଆର ସ୍ୱାଭିମାନ
ଓଡ଼ିଶୀ ନାଚର ମହତ୍ତ୍ଵ ରହିଛି
ଓଡ଼ିଶା ରୁ ହିଁ ଓଡ଼ିଶୀ
ଅନ୍ୟ ଭାଷା ଲେଖା ସ୍ଵାଦ ଲାଗେ ନାହିଁ
ଓଡ଼ିଆ ଲେଖିଲେ ଖୁସି ।
ଭଲ ଲାଗେ ମା' ଆଉ ମାଟିର ଭାଷା
ଢେଗ ଢମାଳି କଥା
ରାଗ ରାଗିଣୀ ଓ ଛନ୍ଦ ଚଉପଦୀ
ଆଡୁଆ ମାଡୁଆ କଥା
ଓଡ଼ିଆ ଭାଷାର ପୁରୁଣା ସଙ୍ଗୀତ
ହୃଦୟ ହୁଏ ମୋହିତ
ଯେତେ ଥର ଶୁଣିଲେ ଗୀତି କବିତା
ଉଦାସ ମନରେ ଶାନ୍ତ
ଓଡ଼ିଆ ଭାଷାର ପୁରାତନ କାବ୍ୟ
ପୁଣି ଚମ୍ପୁ ଆଉ ଛାନ୍ଦ
ଉପମା ଅଳଙ୍କାର ରୂପକ ସହ
ପାଠକ ପାଏ ଆନନ୍ଦ
ଓଡ଼ିଆ ଭାଷାର କାବ୍ୟ ଓ କବିତା
ଚମ୍ପୁ ଛାନ୍ଦ ରୂପକ
ଅଳଙ୍କାର ସହ ହୋଇଛି ସଜ୍ଜିତ
ଭାବ ଜାଗ୍ରତ ଅନେକ ।
ରସ ଭରି ଅଛି ରସକଲ୍ଲୋଳ ରେ
ଭରପୁର କୃଷ୍ଣ ରସ
ରସ ଅଛି ବୈଦେହୀଶ ବିଳାସ ରେ
ସାହିତ୍ୟର ଶୁଦ୍ଧ ରସ
ରସରେ ପ୍ଲାବିତ ଅଛି ସାରା କାବ୍ୟ
ଯେତେ ପିଇଲେ ଶୋଷ
ପ୍ରକୃତ ରସର ସ୍ଵାଦ ଅଟେ ନିଆରା
ମେଣ୍ଟି ଯାଏ ଅବଶୋଷ
କାବ୍ୟରେ ରୂପକ,ତୁଳନା ସଂଶ୍ଳିଷ୍ଟ
ଜୀବନ୍ତ ଅପରାଜୟ
ପ୍ରତି ପଙ୍କ୍ତି ରେ ଭାବପୂର୍ଣ୍ଣ ଆବେଗ
ପାଠକ ମନ ତନ୍ମୟ ।
ପଥ-ଭ୍ରଷ୍ଟ ଆଜି କବିତା ଓ କବି
କବିତା ଭାବ ବିହୀନ
ଶସ୍ତା କଥା କୁହା କବିତା ଲିଖିତ
ବିଚଳିତ ହୁଏ ମନ
କ୍ଷଣସ୍ଥାୟୀ ଅପଦାର୍ଥ ଦ୍ରବ୍ୟ ପରି
ପଢ଼ିଲେ ମନରେ କ୍ଷୋଭ
ନିଜକୁ ସ୍ଵଘୋଷିତ କବିର ଆଖ୍ୟା
ମାନ ପତ୍ର ପ୍ରତି ଲୋଭ
ବାଦ୍ୟ ରେ ଯେପରି ତାଳ ଲୟ ସ୍ୱର
କବିତାରେ ଅଳଙ୍କାର
ଭାଷାର ବିନ୍ୟାସ ଛନ୍ଦ ଶବ୍ଦ ସହ
ଭାବ ଫୁଟେ ବାରମ୍ବାର
ହୃଦୟ ସହିତ ଆତ୍ମା ବି ଜଡ଼ିତ
ଯେଉଁ ଭାବେ ଅଛି ରହି
ଭାବ ରସ ଭରି ହେଉ କବିତାରେ
ଶୁଦ୍ଧ ଶବ୍ଦ ମନେ ଧ୍ୟାୟି ।
ଓଡ଼ିଆ ସାହିତ୍ୟ ହୋଇବ ସମୃଦ୍ଧ
ଜରୁରୀ ଓଡ଼ିଆ ଭାବ
ହୃଷ୍ଟପୃଷ୍ଟ ହେଲେ ହିଁ ସାହିତ୍ୟ ବୃକ୍ଷ
କାବ୍ୟ କବିତା ଫଳିବ
ଓଡ଼ିଆ ଲେଖିବା ଓଡ଼ିଆ କହିବା
ଓଡ଼ିଆଙ୍କ ନିକଟରେ
ଭାଇଚାରା ସମ୍ପର୍କ ହେବ ସୁଦୃଢ଼
ଓଡ଼ିଆଙ୍କ ହୃଦୟରେ
ମାତୃଭାଷା ପ୍ରେମ ହେଲେ ବିକଶିତ
ଭାଷା ସାହିତ୍ୟ ଉନ୍ନତି
ଅନ୍ତର ର ଭାଷା ସାହିତ୍ୟ ଆକାରେ
ଲେଖି ହୋଇବ ପ୍ରଗତି ।।