ନୂଆ ସାଥୀ
ନୂଆ ସାଥୀ
ସପନ ରାଇଜେ ବଲୁଥିଲା ସିଏ
ନୂଆ ସାଥୀ ଟିଏ ପାଇଁ,
ସେ ସପନ ଆଜି ସତ ହୋଇଗଲା
ମନ ଲାଖି ପ୍ରିୟା ପାଇ ।
କେତେ ଦୂର ପଥ ଆସିଛି ସେ ଧାଇଁ
ବୀର ଜବାନ ଟି ସେହି,
ଦିନ ରାତି ତାର ଏକ ହୋଇଲାଣି
ମନ ଘରେ ରହୁନାହିଁ ।
ସାଙ୍ଗ ସାଥି ମେଳେ ଦିନ କଟିଯାଏ
ଥଟ୍ଟା ତାମସା ରେ ମଜି,
କହନ୍ତି ସଭିଏଁ ଚାହିଁ ଅଛୁ ଆମେ
ମନ ତୋର ଯାଏ ହଜି ।
ଆଈମା ଭାଉଜ ଟାପରା କରନ୍ତି
ଆଉ କେତେ ଦିନ ବାକି,
ସାହାନାଇ ଶଙ୍ଖ ମହୂରୀ ଵାଜିଵ
ରହିଥାଅ ତୁମେ ଟାକି ।
ଭୁଲିଯିବ ତୁମେ କନିଆଁ ଟେ ପାଇ
ମନଥିବ ତା'ର ପାଶେ,
ସୀମାରୁ ତୁମେ ଯେ ଛୁଟି ଆସିଅଛି
କେବଳ ତା'ରି ସକାଶେ ।
କାଲି ଲଗନ ଯେ ପରଦିନ ବିଭା
ହଳଦୀ ଲାଗି ଯେ ହେବ,
କନିଆଁ ତୋହର ମେହେନ୍ଦି ଲଗାଇ
ବାଟ ଚାହିଁ ବସିଥିବେ ।
ବିଧିର ବିଧାନ କେ କରିବ ଆନ
ବିଭା ଦିନର ସକାଳ,
ବର ଗାଧୋଇବା ମଙ୍ଗଳ ବେଳା ରେ
ଡାକ ତାକୁ ଯେ ସହଳ ।
ମା, ଖୁଡି, ଆଉ, ଭଉଣୀ, ଭାଉଜ
ହସି ହସି ପାଖେ ଯାଇ,
ଯେତେ ଉଠେଇଲେ ଉଠୁନାହିଁ ସିଏ
କୁମ୍ଭକର୍ଣ୍ଣ ଅବା ସେହି ।
ଜ୍ଵର ହୋଇଥିଲା ଭଲ ହେଇଗଲା
ଏବେ ପୁଣି କ'ଣ ହେଲା,
ଡାକ ଡାକ ଯାଇ ଡାକ୍ତରଙ୍କୁ ଡାକି
ଏ ପୁଣି କ'ଣ ହେଲା ।
ଡାକ୍ତର ଆସିଲେ ବର କୁ ଦେଖିଲେ
ଇହଲୋକ ସେ ନାହିଁ,
କାନ୍ଦ ବୋବାଳି ରେ ଘର ଫାଟିଗଲା
ଅମଙ୍ଗୁଳି ଝିଅ ସେହି ।
କରୋନା ଏତେ ଯେ ନିଷ୍ଠୁର ସତରେ
ହସ ଖୁସି ଵୁଝେନାହିଁ,
ନେଲାରେ ପରାଣ କ୍ଷଣକ ମଧ୍ୟରେ
ବୁଡେଇଲା ଭେଳା ସେହି।