ନଈ

ପ୍ରକୃତି ରାଣୀର ଦିବ୍ୟ ଅବଦାନ

  ତୁହି ଲୋ ସୁନ୍ଦରୀ ନଈ

ହୋଇ ତରତର ଗାଇ କଳକଳ

  କୁଆଡ଼େ ଯାଉଛୁ ବହି |

ପାହାଡ଼ି କନିଆ ଅତି ଅମାନିଆ

  ଲଙ୍ଘି କେତେ ଗିରିବନ

କେଦାର ପ୍ରାନ୍ତର ବନ୍ଧୁର ଉପଳ 

  ଭେଦି ତଳକୁ ଧାବନ |

ତୋହରି କୂଳରେ ମାନବ ସଭ୍ୟତା

   ହେଲା ଆଦ୍ୟ ବିକଶିତ

ତୋର ଜଳପଥ ବେପାର ବଣିଜ

  ଯାତାୟତେ ନିୟୋଜିତ |

ବେନି ତଟ ତୋର ଶୋଭା ଗନ୍ତାଘର 

  ଗଢ଼ି ଉଠିଲା ବସତି

ଶ୍ୟାମ ଶସ୍ୟଦଳେ ହସିଲା ଧରଣୀ

   ତୋ ଜଳ କରି ସମ୍ପତ୍ତି |

ଶିଳ୍ପର ପ୍ରସାର ହେଲା ତୋର କୂଳ

   କାରଖାନା ମାଳ ମାଳ

ମାନବ କଲ୍ୟାଣେ ସଦା ନିୟୋଜିତ

   ଧୀବର ଜୀବିକା ଥାଳ |

ତୋ ମଧୁର ଜଳ ଅମୃତ ଭଣ୍ଡାର

  କୋଟି କୋଟି ଜୀବଙ୍କର

ସ୍ନାନ ସନ୍ତରଣ ପାନୀୟ ଗ୍ରହଣ

   ଅର୍ଥେ ଲୋଡ଼ା ନିରନ୍ତର |

କାନ୍ତ କମନୀୟ ହାସ୍ୟ ଲାସ୍ୟମୟ

   ଛବି ତୋର ମନୋହର

କିନ୍ତୁ ବର୍ଷାଗମେ ତୋ ଭୀମ ଭୈରବ

   ରୂପଟି ପ୍ରଳୟଙ୍କର |

ଭୀଷଣ ଗର୍ଜନେ କୂଳ ଲଙ୍ଘି ଖରେ

   ବନ୍ୟାରେ କରୁ ପ୍ଲାବିତ

କେତେ ଗାଁ ଗଣ୍ଡା ଭସାଇ ନେଉ ତୁ

  ଉଜାଡୁ ସୁନାର କ୍ଷେତ |

ତୋ ଜଳୁ ଆହରି ବିଦ୍ୟୁତ ବଳ

   ଚଳେ କାରଖାନାମାନ

ତୋ ବାଲୁକା ରାଶି ଜାତୀୟ ସମ୍ପତ୍ତି

   ନିର୍ମାଣରେ ପ୍ରୟୋଜନ |

ପର ଉପକାର ପୁଣ୍ୟମୟ ବ୍ରତ

    ସାଧି ଚିର ହୃଷ୍ଟମନା 

ସାଗର ସଙ୍ଗତି ଲଭି ପୂର୍ଣ୍ଣ ତୃପ୍ତି

   ଜୀବନ ହୋଇଛି ଧନ୍ୟା |