ନିଦ ମାଉସୀ ଦେ ଆଉଁସି
ନିଦ ମାଉସୀ ଦେ ଆଉଁସି
ଅଝଟ କାହ୍ନାର ଚଗଲା ମନ
ଦୁଷ୍ଟାମୀ କରଇ ନାହିଁ ତା ଜ୍ଞାନ
ଖାଇ ଥାଏ ଶୁଣି ବାଇଆ ରାଣ
ପାଟିରେ ଯାକିକି ଖାଦ୍ୟଟି ଜାଣ ll
କୁନି ଓଠେ ହସ ମଧୁର ତାର
କୋମଳ ହୃଦୟ ଆଖି ସୁନ୍ଦର
ନିଦ ଆସିଗଲେ କରେ ଚିତ୍କାର
ଲୋଡ଼ା ହୁଏ ପୁଣି ଗପ ଗୀତର ll
ବାତ୍ସଲ୍ୟ ସ୍ନେହର ପ୍ରେମ ମମତା
ମାଆ ତାର ସାଥି ଅଭୟ ଦାତା
ମାଆର ଆଦର ପାଇ ଶିଶୁ ତା
ହସ ଖୁସି ଖେଳେ ସେ ଆନନ୍ଦିତା ll
କୋଳରେ ଧରିକି ଶିଶୁକୁ ତାର
ଗୀତ ବୋଲେ ମାଆ କରି ଆଦର
ଚଗଲା କାହ୍ନାର ମନ ଅସ୍ଥିର
ନିଦ ମାଉସୀଟି ଯେ ଦରକାର ll
ନିଦ ମାଉସୀଲୋ ନିଦ ମାଉସୀ
ପରୀ ରାଇଜରୁ ଆସେ ତୁ ଖସି
କାହ୍ନାର ହାତରେ ଦେଏ ତୁ ଶଶି
ଶୁଆଇ ଦେ ତାକୁ ପାଖରେ ବସି ll
ତା ପାଇଁ ଆଣିବୁ ସବୁ ଖେଳଣା
ହାତୀ ବାଘ ଘୋଡା ଡୋଜର ସିନା
ଅନ୍ୟକୁ ଦେବାକୁ କରିବୁ ମନା
ତା ସଙ୍ଗେ ଖେଳିବୁ ହୋଇ ଆପଣା ll
ଆଉଁ ସି ଦେଏ ଲୋ କାହ୍ନା ଶରୀର
ଶୋଇପଡ଼ୁ ସିଏ ବେଳ ଉଛୁର
ଉଠିଲେ ଖେଳିବ ଲୁଚା ଲୁଚିର
ଭାବି ଶୋଇଗଲା କାହ୍ନା ଏଥର ll
କଳ୍ପନା ରାଇଜେ କରଇ ଚିନ୍ତା
ସ୍ୟପ୍ନରେ ବାଉଳି ଘୂରେ ତା ମଥା
ନିଦ ମାଉସୀର ସରିଲା କଥା
ବାପା ମାଆ ତାର ଗେଲେ ହସୁଥା ll