ନେଉଛି ଦୃଢ ଶପଥ

ସବୁଠୁ ସୁନ୍ଦର ମୋ ଦେଶ ଭାରତ

ପ୍ରିୟତମ ମୋର ପ୍ରାଣ

ଜୀବନେ ମୋ ଲକ୍ଷ୍ଯ ତାହାର ପ୍ରଗତି

ଉତ୍କର୍ଷତା ସର୍ବାଙ୍ଗୀନ ।

ତାର ନଦନଦୀ ପାହାଡି ଝରଣା

ଜଳାଶୟ ସରୋବର

ମଧୁର ଜଳରେ ଅଟେ ଭରପୂର

ଜୀବନ ଶକ୍ତି ଆଧାର ।

ତା ଗିରି କାନନ ବନ ପରବତେ

ପରିପୂର୍ଣ୍ଣ ସବୁଜିମା

ଛୁଟେ ନନ୍ଦନର ଚନ୍ଦନ ସୁଗନ୍ଧ 

ମହକଇ ମାଧୁରିମା ।

ଉର୍ବର ତା ବକ୍ଷେ ଉପୁଜଇ ଶସ୍ଯ 

ନାନା ଜାତି ଫଳମୂଳ

ଉନ୍ମେଷେ ଜୀବନ ସମୁଜ୍ଜ୍ୱଳେ ରଙ୍ଗ 

ଫୁଟେ ଶାନ୍ତି ଶତଦଳ ।

ତା ନୃତ୍ଯ ସଙ୍ଗୀତ ସୁର ଛନ୍ଦମୟ

ତୋଳେ ମଧୁର ମୂର୍ଚ୍ଛନା

ଭରିଛି ମୋ ଦେଶେ ପ୍ରାଚୁର୍ଯ୍ୟ ଐଶ୍ଵର୍ଯ୍ୟ

ଐତିହ୍ଯଶ୍ରୀ ଅନୁପମା ।

ମାତୃଭୂମି ମୋର ଅତୁଲ୍ଯା ଅନନ୍ଯା

ମହାନ ଦେଶ ଭାରତ

ଢାଳି ମନ ପ୍ରାଣ କରିବି ତା ସେବା

ନେଉଛି ଦୃଢ ଶପଥ ।