ମୁଁ ଶିଶୁଟିଏ କହୁଛି

ଶିଶୁଟିଏ ମୁଁ ହସିବି ଖେଳିବି

   ପାରୁଛ ତ ମୋତେ କୋଳେଇ ନିଅ

ଜାଣେ ନାହିଁ ମୁଁ ପର ଆପଣାର

   ଭାବିନିଏ ନିଜ ପାଇଲେ ସ୍ନେହ ।

ଅବୋଧ ଅଜ୍ଞାନ ବାଳୁତ ମୁଁ ଶିଶୁ

   ମାଆର ପଣତ ଧରେ ଜାବୋଡି

ମେଣ୍ଟାଏ ନିଜର ସବୁ ଭୋକଶୋଷ

   ନିସ୍ରବେ ଅମୃତ ମୁଖେ ନିଗିଡି ।

ଯେହେତୁ ଜାଣେନି ଛନ୍ଦ ମାୟା ମୋହ

   ମାତିଥାଏ ନିତି ମୁଁ ହସଖେଳେ

ଦରୋଟି ମୋ କଥା ଲାଗେ ଗୁଲୁଗୁଲୁ

    ଚାଲେ ହଲି ଝୁଲି ମୁକୁତା ଝରେ ।

ଲାଗେ ମୋତେ ଭଲ ତୋଳିଦେଲେ ମାଆ

   ମିଞ୍ଜି ମିଞ୍ଜି ତାରା ଆକାଶ ଫୁଲ

ହାତ ଠାରି ଦେଲେ ଖସିପଡେ ଜହ୍ନ

   ଆଖିରେ ଭରଇ ରାତିଏ ନିଦ ।

ଶିଶୁଟିଏ ମୁଁ ଜାତି ଭବିଷ୍ୟତ

   ଜାଣିନାହିଁ ସୁଖ ମୋ ଅଧିକାର

ଅଲୋଡା ନୁହେଁ ମୁଁ ଅବହେଳା ପାତ୍ର

   ବର୍ବରତା ଅଟେ ହତ ଆଦର ।

ଲୋଡେ ଉପଯୁକ୍ତ ସୁରକ୍ଷା ଯତନ

   ଶିକ୍ଷା ଦୀକ୍ଷା ସେବା କର ଉନ୍ନତ

ଶିଶୁଟିଏ ମୁଁ କହୁଛି ହୃଦୟୁ

   ଚିହ୍ନ ଜୀବନକୁ ଯନ୍ତ୍ର ମଣିଷ ।