ମୋ ପ୍ରେମିକା - ୨

ଆଖି ଢଳ ଢଳ ଚାଲି ତା ମନ୍ଥର

ଆଖିରେ ତା ପ୍ରୀତି ଗଙ୍ଗା

ଏଇ ବଗିଚାର ରଜନୀଗନ୍ଧା ସେ

ସେ ମୋର ପ୍ରୀତି ସୁଗନ୍ଧା ।

ପ୍ରେମିକା ମୋହର ଛନ୍ଦରେ ଛନ୍ଦରେ

ଅମୃତ ବରଷି ଯାଏ

ପ୍ରେମର ସ୍ରୋତରେ ହୃଦୟ ପ୍ଳାବିତ

ତା ପ୍ରେମ ବନ୍ଧିତ ନୁହେଁ ।

ମୋ ପ୍ରେମିକା ନୁହେଁ ସ୍ଵର୍ଗ ଅପସରୀ

ସରଳତା ଭରା ଭାବ

ପ୍ରେମ ପରିଭାଷା ତା ପାଖରେ ସ୍ପଷ୍ଟ

ଶାନ୍ତ କାନ୍ତ ତା ସ୍ୱଭାବ ।

ମୋ ପ୍ରେମିକା ଅଟେ ସଂସ୍କାର ସେତୁ ଟେ

ଲକ୍ଷ୍ମଣ ରେଖା ଲଙ୍ଘେନି

ତା ଶାଶ୍ଵତ ପ୍ରେମେ ସବୁ ସମ୍ପର୍କକୁ

ବାନ୍ଧିବା ରେ ବ୍ରତୀ ଅଛି ।

ପ୍ରେମ ଭରା ତାର ଶବ୍ଦରେ ଶଦ୍ଦରେ

କେତେ ଯାଦୁକରୀ ଭରା

ସେ ଯାଦୁରେ ମୋତେ ସ୍ତମ୍ବିତ କରିଛି

ସିଏ ମୋ ପ୍ରୀତି ପସରା ।

ପ୍ରେମିକା ମୋହର ପ୍ରେରଣାର ଉତ୍ସ

ପୁଣ୍ୟ ସ୍ରୋତସ୍ଵିନୀ ଧାରା

ତା ପରଶେ ପରା ଧୋଇ ହୋଇଅଛି

ମୋ ଜୀବନ କଳା ସାରା ।

ମୋ ଜୀବନ ଗୁରୁ ପଥ ପ୍ରଦର୍ଶିକା

ଅପୂର୍ବ ବ୍ୟକ୍ତିତ୍ୱେ ଭରା

ଶଙ୍କୁଚିତ ନୁହେଁ ତା ପ୍ରେମ ସମ୍ଭାର

ପ୍ରସାରିତ ଭାବଧାରା ।

ମୋ ପ୍ରେମିକା ମୋତେ ବିପଥୁ ଉଦ୍ଧାରି

ସୁପଥ ଦେଖାଇ ଅଛି 

ମୋ ଜୀବନେ ସିଏ ଆଲୋକ ଭରିଛି

କିଛି କେବେ ନ ମାଗିଛି ।

ସୁଖରେ ଦୁଃଖରେ ହାତ ଛାଡିନାହିଁ

ବୁଝାମଣା ସେତୁ ଟିଏ

ଜୀବନ ଜିଜ୍ଞାସା ପ୍ରସ୍ତର ଉପରେ

ଝଙ୍କା ବରଗଛ ଟିଏ ।

ମୋ ପ୍ରେମିକା କେବେ କିଛି ମାଗି ନାହିଁ

ତ୍ୟାଗମୟୀ ମୂର୍ତ୍ତି ଟିଏ 

ସିଏ ହେବ ମୋର ଜୀବନ ସଙ୍ଗିନୀ

ଏ କଥା ତ ମିଛ ନୁହେଁ ।