ମଧ୍ୟବିତ୍ତ

କାମ ନ କଲେ ବି ମାଗଣା ମିଳୁଛି 

ଯାଚି ଦେଉଛନ୍ତି ସରକାର 

ଶ୍ରମ ଦେଇ କେହି ମୂଲ ପାଉନାହିଁ 

ଅଭାବୀ ସଂସାର ହାହାକାର ॥

ବସି ଶୋଇ ଖାଇ ମାଗଣାରେ କେତେ 

ସମୟ କାଟନ୍ତି ଅୟସରେ 

ହକ୍ ପାଇଁ କେହି ଅନଶନ କରେ 

ରାତି ଦିନ ଖରା ବରଷାରେ ॥

ମାଗଣା ଯୋଜନା ଫଳ ହେଲେ ଉଣା 

ଅଭିଯୋଗ ଘରେ ବସି ଶୋଇ 

ତକ୍ଷଣେ ସର୍କାର ନିର୍ଦ୍ଦେଶ ଦିଅନ୍ତି 

ଫଳ ଦେଇ ଆସ ଘରେ ନେଇ ॥

ଲହୁଲୁହ ମାରି ବହୁ ଶ୍ରମ ଦେଇ 

କାମ କରିଥାନ୍ତି କର୍ମଚାରୀ 

ପ୍ରାପ୍ୟ ପାଇଁ ଗଳା ଫଟେଇ କାନ୍ଦିଲେ 

ଶୁଣି ସରକାର ପଡେ ଶୋଇ ॥

ଶ୍ରମ ଯିଏ କରେ ରାଜକୋଷ ଭରେ 

ଟିକସ ଖଜଣା କର ଦେଇ 

ଭୋଗେ ପୁଣି ଦୁଃଖ ଯନ୍ତ୍ରଣା ଓ କଷ୍ଟ 

ଅର୍ଥ ଅଭାବର ବୋଝ ବୋହି ॥

ଦଳେ ଖଟୁଛନ୍ତି ଦଳେ ଲୁଟୁଛନ୍ତି 

ଦଳେ ଖାଉଛନ୍ତି ମାହାଳିଆ 

ଖଟିବା ଲୋକର ନିଅଣ୍ଟିଆ ଦୁଃଖ

ଖୁସିରେ ନାଚନ୍ତି ମାଗଣାଖିଆ ॥

ମାଗଣାରେ ଦାନ ରାଜକୋଷ ଶୂନ୍ୟ 

ଗରିବଙ୍କ ନାମେ ଲୁଟପାଟ 

ଉପରରୁ ତଳ ଭାଗ ହେଉ ହେଉ 

ହିତାଧିକାରୀର ବୁଡ଼େ ବାଣ୍ଟ ॥

ଆମ୍ବକୁ ଦେଖେଇ ଆମ୍ବଡା ଦିଅନ୍ତି 

କରି ଯୋଜନାର ହରିହାଟ 

ଦଳୀୟ ଲୋକଙ୍କୁ ମିଳିଯାଏ କିଛି 

ବିରୋଧୀଙ୍କ ପେଟେ ମାରି ନାତ ॥

ଯୋଜନା ଆଳରେ ଲୋକଙ୍କୁ ଶୋଷଣ 

କ୍ଷମତାର ଅପପ୍ରୟୋଗରେ 

ଗରିବୀ କମୁନି   ଯୋଜନା ବଢୁଛି 

ସବୁ ଚାଲେ ଖାତା କଲମରେ ॥

କାମ କଲା ଯିଏ ନାମ ନେଲା ସିଏ 

କାମ ପାଇଁ ଗାଳି ଖାଇ ଖାଇ 

କାମ ନ କଲେ ବି ଇନାମ ମିଳୁଛି 

ଅଫିସର ପ୍ରିୟପାତ୍ର ହୋଇ ॥

ଛୋଟିଆ ଚାକିରୀ ପେଟକୁ ନିଅଣ୍ଟ 

ସର୍କାରୀ ସୁବିଧା କିଛି ନାହିଁ 

ବିନା ଚାକିରୀରେ ସୁବିଧା ଅନେକ 

ଖାଦ୍ୟ ବସ୍ତ୍ର ବାସ ସବୁ ପାଇ ॥

ବିନା ପରିଶ୍ରମେ ବଞ୍ଚେ ଅଳସୁଆ 

ମାଗଣା ଯୋଜନା ଫଳ ଖାଇ 

ଧନୀ ଲାଞ୍ଚଖୋର ନୁହଁନ୍ତି କାହାର 

ମଧ୍ୟବିତ୍ତ ପାଇଁ କିଛି ନାହିଁ ॥

 କରୁଛି ଗୁହାରି ଆହେ ଦୁଃଖହାରି 

 ଦେବ ଯଦି କେବେ ପୁନର୍ଜନ୍ମ 

 ମଧ୍ୟମ ବର୍ଗରେ ଜନ୍ମ ଦେବନାହିଁ 

 ଏତିକି ମାତର ମୋର କାମ୍ୟ ॥