ଭଗବାନ ତୁମେ ଇସ୍ତଫା ଦିଅ
ଭଗବାନ ତୁମେ ଇସ୍ତଫା ଦିଅ
ଭାବୁଅଛି ମୂର୍ଖ ଅଜ୍ଞାନୀ ମଣିଷ
ଶକ୍ତିଶାଳୀ ସିଏ ଅପରିସୀମ
ରକତକୁ ଶୋଷି ଅରଜିବ ଧନ
ମାନିବ ନାହିଁ ସେ ନୀତି ନିୟମ ।
ସ୍ୱାର୍ଥ କ୍ଷମତାର ଲାଳସାରେ ଅନ୍ଧ
ନାହିଁ ତାର ମନେ ଦୟା କରୁଣା
ଭୋଗ ବିଳାସର ସିଏ ଅଧୀଶ୍ୱର
ବୃଥା ଧର୍ମକର୍ମ ପୁଣ୍ୟ ସାଧନା ।
ପଦତଳେ ତାର ସର୍ବେ ଅଧସ୍ତନ
ମଥାପାତି ପାଳୁଛନ୍ତି ଆଦେଶ
ହେଉ ପଛେ ସତ୍ୟ ଦେଲେ ଭିନ୍ନ ମତ
ବାମ ହାତ ଖେଳ ତା ସର୍ବନାଶ ।
ଅର୍ଥ ବାହୁବଳେ ଯିଏ ବଳୀୟାନ
ତା ଇଚ୍ଛା ପୂରଣେ ନାହିଁ ବାଧକ
ନିୟୋଜିତ ତାର ସେବାରେ ସମ୍ବଳ
ଯନ୍ତ୍ର ନୂଆ ନୂଆ ଅବା ଶ୍ରମିକ ।
ଆଖି ଠାରି ଦେଲେ ଆଜ୍ଞାରେ ତାହାର
ଉଠ ବସ ଧର୍ମ ସୂର୍ଯ୍ୟ ଉଦୟ
ବାହାସ୍ପୋଟ ମାରି ଆସ୍ଫାଳଇ ମୁର୍ଖ
ଭଗବାନ ତୁମେ ଇସ୍ତଫା ଦିଅ ।
---