କର୍ମର ପରିଣାମ

କର୍ମ ପରିଣାମ ଭୋଗିବାକୁ ହେବ

      ଆଜି ନ ହେଲେବି କାଲି

ବୁଦ୍ଧି ବିଚାରରେ କୌଶଳ ବଳରେ

      ସନ୍ତର୍ପଣେ ଯିବା ଚାଲି।

ସ୍ଵୟଂମ୍ଭର ସଭା ଦ୍ରୌପଦୀ ବଚନେ

       କର୍ଣ୍ଣ ଯେ ଅପମାନିତ

ଭାଗ ନେବା ପାଇଁ ଅନୁମତି ଥିଲେ

      ସଙ୍କଟ ନ ଥାନ୍ତା ଆଜିତ ।

ଗାଳି ଦେଇ ଥିଲ ଅନ୍ଧ ପୁତ୍ର ବୋଲି

       ଦୁର୍ଯୋଧନ ଅଭିମାନୀ

ଫଳ ଏହା ହେଲା ବସ୍ତ୍ରର ହରଣ

       ପ୍ରତିଶୋଧ ପ୍ରତିଧ୍ଵନି।

ଦ୍ରୌପଦୀ ଶବଦ କରମ ହୋଇଲା

        ଫଳ ହୋଇଲା ବିଷମ

ବଡ ସାନ ଏଠି ଭେଦ ଭାବ ନାହିଁ

        କରମର ପରିଣାମ।

ନିଜ ଆଚରଣ ନିଜ ଉଚ୍ଚାରଣ

       ରଖି ପାରିଲେ ଉଚ୍ଚରେ

ଜଗନ୍ନାଥ ସ୍ଵାମୀ ଆପଣେଇ ନେବେ

      ସଦା ମୁକ୍ତି ର ପଥରେ।