କଳଙ୍କର ଟିକା ଦେଇ

ଶବ୍ଦରୁ ସୃଜନ-4 : କଳଙ୍କ

କି' ସୁଖ ପାଉଛ କୁହ ଗୋ ଚନ୍ଦ୍ରମା କଳଙ୍କର ଟିକାଦେଇ,

ବିଭାବରୀ ମୋତେ ସଜାଇଛ କିଆଁ ନିରୀହ ମୁଁ ନୀଳକଇଁ |(ଘୋଷା)

ତୁମେ ରଚିଥିଲ ଆକାଶ ରାଇଜେ ପୀରତିର ମାୟାଜାଲ ,

କେତେ ଦୂରେ ଥିଲି ତଟିନୀ କନ୍ୟା ମୁଁ କୁହୁକ ମନ୍ତର କଲ |

ନିଜକୁ ସଜାଇ ହଟିଆ କହ୍ନେଇ ମୋତେ ସଜାଇଲ ରାଈ |

କି' ସୁଖ ପାଉଛ କୁହ ଗୋ ଚନ୍ଦ୍ରମା କଳଙ୍କର ଟିକାଦେଇ | (1)

ଶୁଭେ ମୋର କାନେ ଅପବାଦ ବାଜା ସରମରେ ଯାଏ ଜଳି,

ସହିପାରେ ନାହିଁ କହିପାରେ ନାହିଁ ଦିବସେ ଯାଏ ମଉଳି |

କେତେଦିନ ଆଉ ବଞ୍ଚିବି ଏମିତି ଅଭିସାରିକାଟି ହୋଇ ? 

କି' ସୁଖ ପାଉଛ କୁହ ଗୋ ଚନ୍ଦ୍ରମା କଳଙ୍କର ଟିକା ଦେଇ |(2)