ଖରାଦିନ
ଖରାଦିନ
ଖରାଦିନରେ ଖରା ଯେ ହୁଏ
କିନ୍ତୁ ସେ ଉପକାରୀ
ଖରା ପାଇଁକି ହୁଏ ବରଷା
ହସଇ ଚାଷୀ ଭାରି ।
ଚାଷ ଜମିଟି ଗ୍ରୀଷ୍ମ ଋତୁରେ
କୃଷକ କରେ ହଳ
ରୋଗ ଓ ପୋକ ଦୂର ହୁଅନ୍ତି
ମାଟିରେ ପଶେ ବଳ ।
ଖରାଦିନିଆ ଗୁଳୁଗୁଳିରେ
ଆମ୍ବ ପଣସ ପାଚେ
ଦହି ପଖାଳ ନିମ କଲରା
ପିତା ପାଟିକୁ ରୁଚେ ।
ମୁଗ ହରଡ଼ ବିରି କୋଳଥ
ଶୁଖାଇ ଯେବେ ରଖ
ବରଷ ଯାକ ରହେ କୋଠିରେ
ଲାଗେନି ଜମା ପୋକ ।
ତରଭୁଜ ଓ ତାଳସଜ ଯେ
ଖରାଦିନିଆ ଫଳ
ଖରାଦିନରେ ପାଣିପାଇଲେ
ଫସଲ ହୁଏ ଭଲ ।
ବୋଉ ଆମର ବିରିକୁ ବାଟି
ସୁନ୍ଦର ବଢ଼ି ପାରେ
ଖରାରେ ବଢ଼ି ସଅଳ ଶୁଖେ
ବୋଉ ସାଇତି ରଖେ ।
ଖରା ବରଷା ଶୀତ ସବୁରି
ସୁନ୍ଦର ଆମ ପାଇଁ
ଋତୁ ମଧ୍ୟରେ ବାଛବିଚାର
କଦାପି କରନାହିଁ ।।