ଉତ୍କଳ ଦିବସ
ଉତ୍କଳ ଦିବସ
କଳିଙ୍ଗ,ଉଡ୍ର ଅବା ଉତ୍କଳ
ନାମ ଓଡ଼ିଶାର କଳାର ସ୍ଥଳ ।
ବନ୍ଦେ ଉତ୍କଳ ଜନନୀ ଗାଇ
ନଦୀନାଳ ଏଠି ଯାଏରେ ବହି ।
ମୋ ଭାଷା ଓଡ଼ିଆ,ଓଡ଼ିଶୀ ନୃତ୍ୟ
ଅଟଇ ବଢ଼ିଆ ବିଶ୍ଵ ବିଖ୍ୟାତ ।
ଡଙ୍ଗା ଭସା,ରଜ,ପବିତ୍ର ହୋଲି
ପାଳୁ ଏକ ହୋଇ ବିଭେଦ ଭୁଲି ।
ପୁରୀ କୋଣାରକ ଗର୍ବ ଆମରି
କାଳିଆ ଠାକୁର ପ୍ରତ୍ୟେକ୍ଷ ଭାରି ।
କାରିଗରଙ୍କର ନିହଣ ମୁନ
ପଥରକୁ ଏଠି ଦିଏ ଜୀବନ ।
ଖଣ୍ଡଗିରି ଅବା ଧଉଳି ସ୍ତୁପ
ସାଧନା ଶାନ୍ତିର ପବିତ୍ର ପୀଠ ।
ଫକୀରମୋହନ,ମଧୁସୂଦନ
ଅଭୁଲା ତାଙ୍କର ସାହିତ୍ୟ ଦାନ ।
ଓଡ଼ିଆ ଭାଷାର କାବ୍ୟ କବିତା
ସବୁଠୁ ନିଆରା ଲାଗଇ ମିଠା ।
ମାତୃଭାଷା ମୋର ଓଡ଼ିଆ କହେ
ପାଇକ ରକତ ଆମଠି ବହେ ।
ଜୟୀ ରାଜଗୁରୁ,ବାଜି ରାଉତ
ତାଙ୍କ ପାଇଁ ମାତୃଭୂମି ଗର୍ବିତ ।
ବୀର ନେତାଜୀଙ୍କ ନିର୍ଭୀକ ବାଣୀ
ଶତୃ ଆଗେ ଶକ୍ତି ଯୋଗାଏ ପୁଣି ।
ଜୀବେ ଦୟା ଭାବ ମାନବ ସେବା
ଉତ୍କଳମଣିଙ୍କ ଠାରୁ ଶିଖିବା ।
ଘଣ୍ଟଘଣ୍ଟି ଶୁଭେ ମଠ ମନ୍ଦିରୁ
ଗୀତା ଭାଗବତ ପୁରାଣ ପଢୁ ।
ସଙ୍କୀର୍ତ୍ତନ,ପାଲା,ଦାସକାଠିଆ
କେନ୍ଦେରା,ଭଜନ ଅତିବଢ଼ିଆ ।
ବଣ,ପାହାଡ଼ ଓ ସବୁଜ ବିଲ
ଘୋଡ଼ା ନାଚଗୀତ ଲାଗଇ ଭଲ ।
ଉତ୍କଳ ଦିବସ ଦିଅଇ ବାର୍ତ୍ତା
ମାଟି,ଭାଷା ପ୍ରତି ରଖ ମମତା ।