ଖଣ୍ଡିଆ ଭୂତ

ଖଣ୍ଡିଆ ଭୂତ ସେ ଖଣ୍ଡିଆ ଭୂତ

            ଖେଳୁଥାଏ ଖେଳ ଭାରି ଅଦ୍ଭୁତ।

ବୁଲୁଥାଏ ସଦା ଚକା ଭଉଁରୀ 

            ଧୂଳି କୁଟା କାଠି ପେଟରେ ଭରି ।

କେବେ ରୂପ କ୍ଷୁଦ୍ର କେବେ ବୃହତ 

            ଦେଖିବାକୁ ମିଳେ ହଜାର ଭୂତ ।

ପବନ ହୋଇଲେ ଭାରି ଉତ୍ତପ୍ତ 

            ଉଠିଥାଏ ସେଠୁ ଖଣ୍ଡିଆ ଭୂତ ।

ବୈଶାଖ ଜ୍ୟେଷ୍ଠରେ କରଇ ଘର 

           ଲାଗିଥାଏ କେବେ ସେ ଭୟଙ୍କର।

ଜଳରେ ଖେଳେ ସେ ସ୍ଥଳରେ ଖେଳେ 

          ଖେଳୁଥାଏ ଖେଳ ତା' ବାହୁ ବଳେ ।

ସମୟ ଢ଼େଉରେ ଆସଇ ମାଡି 

           ପାଣି ଧୂଳି ଢ଼େଉ ନିଜେ ସେ ଗଢି।

ଦୃଶ୍ୟ ହୁଏ ନାହିଁ ଶରୀର ତାର 

            ସେଥିପାଇଁ ଭୂତ ନାମ ତାହାର ।

ପ୍ରକୃତି ହୋଇଲେ ଆମ ଅଥୟ 

             ଖଣ୍ଡିଆ ଭୂତର ଥାଏ ତ ଭୟ ।

ହୁଏ ଭୟଙ୍କର କ୍ଷଣକ ପାଇଁ 

            ଧନ ଓ ଜୀବନ ଦିଏ ସେ ଖାଇ।

ଅଦୃଶ୍ୟ ହୁଅଇ ଦେଇ ପ୍ରହାର 

           ଦେଇଥାଏ ଶିକ୍ଷା ତା' ବ୍ୟବହାର ।

ଆସ ଆସ ଆଜି ହେବା ସଜାଗ 

             ବାଛିବା ସୁରକ୍ଷା ପ୍ରକୃତି ଦିଗ ।

ହଜି ଚାଲିଯିବ ଖଣ୍ଡିଆ ଭୂତ 

          ନ ଥିବ ସଂସାରେ ତା' ପାଇଁ ଭୀତ।