କେଣେ ଘେନି ଯାଉଛ ଜଗନ୍ନାଥଙ୍କୁ

କେଣେ ଘେନି ଯାଉଛ କୁହ ଜଗନ୍ନାଥଙ୍କୁ

ରହିଲେ ଅତୁଟ    ଶ୍ରୀମନ୍ଦିର ଶିରୀ

   ଟେକିବେ ସେ ମହାବାହୁକୁ ।

ହେବ ଯଦି ଖାଲି    ବଡ ଆମ ପାଇଁ

      ସ୍ବାର୍ଥ ଆଉ ପରିବାର

ରହିବନି ଯଦି      ମଠ ଓ ମନ୍ଦିର 

     ଜାଗା ହେବ ଅକ୍ତିଆର 

ତ୍ଯାଗ ତପଭୂମି   ହେଲେ ଭୋଗାବିଷ୍ଟ

    ଶ୍ରୀକ୍ଷେତ୍ର ପାଇବ ନିନ୍ଦାକୁ ।

ଦିବ୍ଯ ମାଧୁର୍ଯ୍ୟର    ପୁଣ୍ଯ ମୁକ୍ତିତୀର୍ଥ

     ଧାମ ଶ୍ରୀପୁରୁଷୋତ୍ତମ 

ଅଧମ ବିଚାରେ     କ୍ଷମତା କନ୍ଦଳେ

     ନହେଉ ରଣ ଅଙ୍ଗନ

ହେଉ ଧରୋହର    ଐତିହ୍ଯ ସଂସ୍କାର 

    କରନ୍ତୁ ସେବକେ ସେବାକୁ ।

ପାରିିବେନି ଜାଣି    ମାଙ୍କଡିଆ ଦଳ

     ଶାଳଗ୍ରାମ ଶ୍ରୀମହିମା

ଭକ୍ତି ଗୋ ବ୍ରାହ୍ମଣ   ଗୁରୁ ମାତାପିତା

     ମହେଶ୍ବର ବିଷ୍ଣୁ ବ୍ରହ୍ମା

ଆମ ଜାତିଧର୍ମ     ମାନବିନ୍ଦୁ ଭବ୍ଯ 

     ନଯାଉ ଗାତ ଓ ଚୂଲିକୁ ।

ନ ବୋଲାନ୍ତୁ ମୁଢ   ନୀଚ୍ଚ ନରାଧମ

     ନିଜକୁ ସରବେ ସର୍ବା

ଦଂଶିବା ଅଟଇ     ସର୍ପର ପ୍ରକୃତି

     ହାର ଯଦିଚ ମଣିବା

ସର୍ପାଘାତେ ହେବ   ମରଣ ନିଶ୍ଚିତ 

     ଜାତି ଯିବ ରସାତଳକୁ ।

ଆହ୍ବାନେ ସମୟ    ଆସ ପ୍ରିୟଜନ

      ଅନୁସରି ଧର୍ମ ସତ୍ଯ 

ସୁଯୋଗ୍ଯ ସମର୍ଥ    ସୁକର୍ତ୍ତବ୍ଯନିଷ୍ଠ

     ହେବା ଆମେ ସୁସଂହତ 

ନେବା ଆସ ଆମେ   ଜୀବନେ ଶପଥ 

      ସୁମରିବା ଆମ ଇଷ୍ଟଙ୍କୁ ।