Library
ଜୀବନର ଚଲାପଥେ
ଜୀବନର ଚଲାପଥେ
ଜୀବନର ଚଲାପଥେ
ଅନେକ କଣ୍ଟା
ତଥାପି ମଣିଷ କହୁଛି
ମୁଁ ନିଷ୍କଣ୍ଟକ ।
ଜୀବନର ଚଲାପଥେ
ଅନେକ ଦୁଃଖ ଓ ବିଷାଦ
ମଣିଷ ଭାବୁଛି ସେ
ଭୋଗୁଅଛି ଆନନ୍ଦ ।
ଜୀବନର ଚଲାପଥେ
କେତେ ଘାତ ପ୍ରତିଘାତ
ମନୁଷ୍ୟ କୁହେ ମୁଁ
ମୋ ଜୀବନେ କେବେ
ପାଇନି ଆଘାତ ।
ଜୀବନର ଚଲାପଥେ
ଆସେ କେତେ ଯେ ସଂଘର୍ଷ
ବନ୍ଧୁ ପାଶେ ବଦନ ତା
ଦେଖାଏ ହର୍ଷ ଉଲ୍ଲାସ ।
ଜୀବନର ଚଲାପଥେ
ଆସେ କେତେ ଯେ
ମୁହୂର୍ତ୍ତ ବିରହର
ଘୁମୁରି ଘୁମୁରି କାନ୍ଦି ଅନ୍ତରେ
ସଭିଙ୍କୁ ଦେଖାଏ ତା
ହୃଦୟ ଓ ମନ ପରିପୂର୍ଣ୍ଣ ହର୍ଷର ।
ଜୀବନର ଚଲାପଥେ
ଯଦି ଭରା ଏତେ ଖାଲ ଖମା
ଅନ୍ତରଙ୍ଗ ବନ୍ଧୁ ବାନ୍ଧବୀ କିମ୍ପା
ବନ୍ଧୁ ପାଶେ ନ ଖୋଲନ୍ତି
ତାଙ୍କ ଜୀବନ ଯାତ୍ରା ର
ବେଦନା ଭରା କାହାଣୀ ଜମା ।
ଜୀବନର ଚଲାପଥେ
ସଙ୍ଗ ଦେବା ପାଇଁ
ନ ମିଳନ୍ତି କି କେହି
ବିଶ୍ଵସ୍ତ ସାଥୀ
ନା ଏ ସ୍ଵାର୍ଥପର ଦୁନିଆଁରେ
ସଭିଏଁ ସୁଖର ସାରଥୀ ।
ଜୀବନର ଚଲାପଥେ
ଖାଲି କ'ଣ ମିଳନ୍ତି
ଅବିଶ୍ଵାସୀ ମଣିଷ
ତେବେ ଦିନ ରାତି
ହେଉଛି କିପରି
ଚାଲିଛି କିପରି
ଏ ସଚରାଚର ବିଶ୍ଵ ।
ଜୀବନର ଚଲାପଥେ
ସଭିଏଁ କ'ଣ ବିଷାକ୍ତ
ସଭିଙ୍କ ମନ ଓ ହୃଦୟ
କ'ଣ କଳୁଷିତ
ନଦୀ ଯେବେ ମିଶେ ସାଗରରେ
ନଦୀ ଜଳ ଅବଶ୍ୟ ହୁଏ ଲବଣାକ୍ତ
ହେଲେ ସେ ଜଳ ନୁହେଁ ତ ବିଷାକ୍ତ
ତିକ୍ତତା ଓ ମଧୁରତା କୁ ନେଇ
ଆମ ସଭିଙ୍କ ଜୀବନ ଗଠିତ
ଜୀବନର ଚଲାପଥେ
ସଭିଏଁ ନୁହଁନ୍ତି ବିଷାକ୍ତ
ଅନ୍ଧକାର ନୁହେଁ ସବୁ ମୁହୂର୍ତ୍ତ ।
